رسالة متاخرة اوى

وحشتنى اوى اوى..وحشنى صوتك وكلامك وحركاتك..ياترى لو كنت عايش لغاية دلوقتى كان هيبقى شكلك ايه.??.الشعر الابيض كان هيبقى حلو اوى عليك لكن للاسف انت رحت وانت لسه شاب..يمكن  اكون عمرى ما قلت لك انى بحبك رغم انى كنت حاسة بيها وكانت جوة قلبى اوى بس صغر سنى منعنى انى اقولها..(اعملك ايه بقى ماانت سبتنى وانا صغيرة اوى)..كنت بمشى معاك والدنيا ظلمة واقولك انا خايفة اوى يا بابا..وترد عليا بحنان وحب: طول ما انا معاكى ماتخافيش من اى حاجة فى الدنيا...لكن انت رحت وسيبتنى وبقيت بخاف بعدك من حاجات كتير اوى..كنت اتمنى انك تكون جمبى وتطمنى ..وحشنى حضنك ووحشنى دلعك ليا ووحشتنى الشكولاتة اللى كنت بتجيبها لى..كانت احلى شكولاتة  أكلتها فى حياتى..عشان انت اللى جايبها..كان طعمها كله حنان وحب..فيه حاجات كتيرة عايزة احكيها لك..وفيه حاجات نفسى اخد رايك فيها...ولو انى عارفة رايك فى  كل حاجة وعارفة انك عارف كل اخبارى لانك كنت بتجيلى فى الحلم تبشرنى بيها قبل ما تحصل..بتفائل لما بشوفك فى الحلم..بعرف ان فيه خير هيجيلى قريب..عدت عليا فترات صعبة وحلمت بيك ساعتها جاى تطمنى وفرحت انى شفتك ونسيت كل حاجة وحشة..وجيت بشرتنى قبل الحمل ببنتى..بنتى اللى كان نفسى انك تشوفها وتفرح بيها..كان نفسى بنتى تقولك يا جدو..كنت هتبقى احلى جدو فى الدنيا..بس انا واثقة انك حاسس بيها وفرحان كمان..اخر حاجة عايزة اقولها لك انى بحبك اوى وان مفيش اى حاجة فى الدنيا عوضتنى عنك وعن حنانك..الله يرحمك يابابا...

فيس بوك...نسخة مصرى

الشاب اللى اخترع الفيس بوك عشان يكلم صحابه ويتواصل معاهم عن طريقه ويسالهم(ياترى بتعملوا ايه دلوقتى؟) مكانش عارف ان اغلب المصريين بقى هيستخدموه استخدام مختلف وهوا (اوعى تخلى حد يعرف انت بتعمل ايه دلوقتى!!)او بمعنى اصح(اوعى تقول الحقيقة) وده عشان 3 حاجات..اول حاجة عشان الضرايب يعنى بلاش تكتب(انا اشتريت عربية جديدة)..وتانى حاجة عشان يزوغ من المدام براحته (انا فى الشغل دلوقتى والله وطالع عينى)..وتالت حاجة عشان الحسد..اصل العين وحشة برضه..ماينفعش مثلا تكتب ع ال wall
(انا خطبت يا جماعة)..اصل كده العيال صحابك هيقروا عليك وهيدوك عين من اللى هيا وتانى يوم تفسخ خطوبتك يا حلو..وتبقى غبى بقى الصراحة لو كمان نزلت صور خطوبتك..انت كده تبقى جبته لنفسه. ممكن تنزل بس صورتك وانت بتلبسها الشبكة عشان تذلها بيها بعد كده .ما ينفعش كمان تحط صور خطيبتك او مراتك اصل انت كده الصراحة يبقى معندكش نخوة...بالنسبة للبنات بقى ماينفعش يحطوا صورهم وماتقوليش ده اسمه فيس وفيس يعنى المفروض نشوف بعض..اصل المحروس جوزك مابيفرقش معاه الحاجات دى ولو اخد خبر ان حضرتك حاطة صورتك حتى لو كانت بالنقاب هيكسر لك اللاب توب وهيلغى اشتراك النت وابقى ورينى هتدخلى تكلمى صحبتك ازاى يا فالحة..(حطى صورة السنيورة بنتك وخلاص)
بالنسبة بقى للcomments يعنى التعليقات اللى الصحاب بيكتبوها لبعض..مثلا تلاقى واحد كاتب (مش عايز اروح الشغل بكرة..)))
اتفرجوا بقى ع تعليقات صحابه
اول واحد يعلق: وانا كمان مش عايز اروح شغلى اصل عربيتى مزنوقة فى الجراج ( وهوا بكده عايز صحابه وصحباته يعرفوا ان عنده عربية..هى ممكن تكون نص كم او حتى توك توك بس اهى عربية  وخلاص وبيتباهى بيها
تانى واحد كاتب تعليق غريب: كل عام وانتم بخير .الاولاد والجماعة عاملين ايه؟(طبعا ملاحظين انه بيتكلم عن موضوع تانى خالص)
تالت واحد معلق: هوا بقى فيه شغل اصلا..هيا الشباب لاقيه شغل..الشغل كله زى قلته وفى الاخر بتقبض كام يعنى!!
(ده واحد مخنوق وتعليقاته تخنق زيه)
واحد رابع بقى معلق: ((((loooooooooool
(هوا اصلا مش لاقى كلام يقوله..بس مايهونش عليه يسيب الcommentبتاعه فاضى.لازم يعلق اى تعليق)
وتلاقى ناس تعمل share لحاجات غريبة يعنى واحدة عاملة share لطريقة تشريح الضفدعة..طيب هيا فى كليه طب..مش لازم تقرف الناس معاها
والتانى عامل share لهدف ابو تريكة فى الانتاج الحربى..طب مااحنا شفنا الهدف قبل كده يا سيدى ولا انت لازم تفرس صحابك الزملكاوية وتموتهم بحسرتهم..
وتلاقى واحدة منزلة صورتها وهى بتتفسح مع جوزها عشان تغيظ صحبتها والتانية حاطة صورتها وهى فى المطعم وبتاكل بطاطس بالكاتشاب عشان اهلها يعرفوا ان جوزها مش بخيل وبيوديها مطاعم وكده..)
فيه ناس بقى الفيس بوك عندهم هوايه..24 ساعة فاتحينه لدرجة ان الراجل بقى بيتكلم مع مراته وبيتخانقوا سوا عليه رغم انهم مع بعض فى بيت واحد..
يسالها ع الchat: انتى مش سامعة تليفون البيت بيرن..ماتقومى تردى
تبعت له:ماتقوم ترد انت..انا مشغولة))
يبعت لها: ممممم مشغولة فى ايه يعنى؟؟قومى يمكن تكون امك تعبانة ولا ماتت(((
تبعت له: بعد الشر على ماما..وبعدين يمكن تكون امك انت
يبعت لها:لو امى هتكلمنى ع الموبايل
تبعت له:oops..من امتى مامتك بتتكلم ع الموبايل..الله يرحم
(وتلاقى صحابهم داخلين فى النص يسلكوا..)
صحابهم: يا جماعة صلوا ع النبى..الامور ماتتحلش كده!!
(وكل ده واللى بيتصل لسه برضه عمال يرن..غلس بقى نقول ايه)
وتلاقى البنات اشتروا كتب حكم ومواعظ وكل يوم يكتبوا حكمة تقولوش عباس العقاد
مرة تكتب ع الwall:ليس من الحكمة ان تكونى قمر بل الحكمة ان تكونى شمس
ومرة تقلب على خالتى فتكات وتكتب امثال شعبية
(اللى مايحبش اختى..مالوش خير فيا ولا فى اختى)
ومرة تقلب على فقرة الاعلانات( الراجل مش بس بكلمته ..الراجل برعايته لبيته واسرته) وهيا تقصد فرغلى جوزها اللى بقاله يومين بايت برة البيت..
وممكن تلاقيها كاتبة اغنية وده حسب حالتها النفسية..اصلك ممكن تعرف الحالة النفسية من الفيس بوك..
يوم تلاقيها كاتبة: الدنيا ربيع والجو بديع
ويوم تانى تتقمص دور المكتئبة: خسارة فيك قلبى.خسارة فيك حبى
وبين قوسين تكتب(واللى على راسه بطحة بقى)
طبعا هيا تقصد الواد ميدو اللى مطنشها بقاله يومين ومتصاحب دلوقتى على فوفو صحبتها اللى شعرها منكوش دى..
وتلاقى ميدو كاتب: مين حبيبى انا؟
وفوفو ترد: انت اللى بحبه انا.
(عايشين دور وائل ونوال)
انا مرة كتبت ع الwall :انا عايزة اكل كنتاكى
لاقيته بعد نص ساعة بيرن ع الباب..قلت له:ايه يا عم كنتاكى انا كنت بهزر..بكتب كلمتين من نفسى يعنى..ايه انتوا هتقفوا لى الكلمة ولا ايه..دى مكانتش كلمة قلتها..انتوا مابتصدقوا..
(خدوا بالكوا بقى احسن الفيس بوك باين عليه متراقب ولا ايه)

طنط اللتاتة والتليفزيون

استحالة اعرف اتابع حاجة فى التليفزيون لو كانت جارتى دى عندنا..ماينفعش اسمع جمليتن ورا بعض اصل ورا كل جملة لازم تسمع تعليق من طنط..وسبحان الله تبقى شايفة المسلسل عشرين مرة وفى كل مرة تسالنى نفس الاسئلة: ايه ده هوا جوزها خانها؟؟
اقولها: اه خانها هوا انتى اول مرة تشوفيه؟
ترد بخباثة:ما انا عارفة..بس بيخونها ليه يعنى؟
وهيا بالسؤال ده بتبقى طرحت موضوع الخيانة للمناقشة يعنى عايزانا بقى نتناقش وناخد وندى وكل واحدة فينا تقول رايها فى الموضوع..يبقى الاحسن اقفل التليفزيون بقى واسمع وجهة نظرها فى الخيانة حتى بالمرة اوفر فى الكهربا ..ولسه جاية اقفله..صرخت فيا: ماتسيبيه..دى الحتة الجاية حلوة اوى..ده انا مستنياها من ساعتها
قلت لها:ليه هيحصل ايه؟
تقولى:اصله هيندم دلوقتى..(طبعا هيا لازم تشوفه وهوا ندمان ومقهور.)..شفتى اهوا ندم اهوا بس يستاهل هوا عمل كده فى نفسه..شفتى؟؟
قلت لها:  ماانا شايفة اهوا
تقولى: اصلك مش واخدة بالك مراته كمان هتندم!!
 بعد شوية اقنعتها اننا نغير القناة بتاعة المسلسل العربى..وهيا اقتنعت بسرعة الصراحة وقالت لى مش مشكلة مااهوا بيتعاد مرتين تانى النهاردة( اصلها ناوية تعمل دكتوراة فى المسلسل)..وجبت قناة اغانى لاقيت اغنية لتامر حسنى..شكلها اغنية جديدة..طبعا جارتى لازم تعلق: هوا المغنى ده طول النهار قاعد فى التليفزيون؟
قلت لها: اه اصله واخد شقة ايجار جمب الاستديو وكل شوية يدخل يغنى ويطلع تانى..
قالت لى: انا سمعت الغنوة دى ميت مرة.اقلبى يا شيخة
قلت لها حاضر وقلبت لاقيت اغنية حلوة اوى لحماقى..ياسلام..قول يا حماقى قول..
طنط:ايه اللى هوا لابسه ده؟؟
انا: لابس جاكيت جلد..ماله؟
طنط:فى عز الحر ده ..هوا احنا فى طوبة
انا:اصله مصورها فى الشتا..مش واخدة بالك ان وراه جليد ومطر
طنط:.ايوة ماانا واخدة بالى..تصدقى الشتا واحشنى..مابقاش فيه مطر زى زمان( دخلنا فى النشرة الجوية)
انا: تصدقى انا بحب الغنوة دى اوى..(يمكن تحس على دمها)
طنط: بتحبيها على ايه؟والله ماانا سامعة منه ولا كلمة ولا فاهمة هوا بيقول ايه؟
انا: ماانتى لو سكتى شوية هتسمعى..انا هقلب الاغنية..واجيب لها فيلم اجنبى احسن عشان ماتفهمش حاجة  وتسكت شوية  بس ياريت ماتفضلش تسالنى هما بيقولوا ايه؟؟..حلو اوى الفيلم ده بحبهhome alone.(.يابخته قاعد لوحده مش معاه جارته وبيتفرج على التليفزيون براحته..)
طنط:بيسرحوا بينا..بقى عيل صغير هيعمل كده فى الحرامية(دخلنا بقى فى النقد والتحليل الفنى)
انا: فيلم بقى يا طنط وخيال وكده..اتفرجى اتفرجى هيعجبك
طنط:الحقى ده الحرامى وقع واتحرق ..يا خرابى..احسن..تستاهل يا حرامى..حرام عليك ده عيل صغير(المفروض انه سامعها وهيسمع كلامها)..انا حاسة انى بتفرج على تعليقات طنط اللى بيتخللها لقطات من الفيلم..ده انتى مملة اكتر من فقرة الاعلانات يا شيخة!!..
اجيب لها برنامج طبيخ احسن يفيدها..اهوا الشيف بيطبخ اهوا يا طنط..ركزى بقى واسكتى شوية عشان تتعلمى حاجة مفيدة..
طنط: هوا ده اكل برضه؟؟بيحط كبدة على لحمة على بيض..استغفر الله..الواحد هيجيب اللى فى بطنه..شكله حلو بس تلاقى طعمه مهبب..اقلبى  اقلبى ده انا بطبخ احسن منه.!!
ايوووة حلوة القناة دى مذيعة مستضيفة ممثلة مشهورة وبتقاطعها زى طنط بالضبط( محدش احسن من حد)..والفنانة الامورة بتتكلم عن فيلمها الجديد اللى حقق ارقام قياسية فى السينما ونجح نجاح ساحق لكن جارتى ليها وجهة نظر تانية :ولا نجح ولا حاجة ده فيلم مزفت ده انا دخلت نمت فى السينما و بعد شوية النور قطع. عمرك شفتى نور يقطع فى السينما؟؟اصلها ممثلة فقر من يومها..والله خسارة فيها العشرين جنيه اللى دفعتهم.!!..خلاص يا طنط احنا نتفرج على مسلسل نور التركى احسن يهدىء اعصابك وينسيكى العشرين جنيه..اهوا مهند بيصالح نور يا طنط اتفرجى..طنط طلعت فيا: بيصالحها على ايه؟من جمالها!!ده احلى منها..وبعدين دى بت فقرية طول المسلسل تتخانق معاه..ايه النكد ده ويقولوا الستات بتوع مصرغاويين نكد طب ازاى ؟اومال ستات تركيا يبقوا ايه بس؟؟
اعمل ايه طيب؟..طنط مش راضية تعمل فاصل خالص!  احسن حاجة اجيب لها كارتون توم وجيرى واهوا ماشى مع الجو اللى احنا فيه..
طنط: الواد جيرى ده سوسة..كل المصايب جاية من وراه..يابنى حرام عليك.ربنا يهدك..وانت يا قط يااهبل..سايبه كده يهزئك..ايوة كده خد حقك..عسل والله..اضربه ..اضرب جامد ماتخافش..اسم الله عليك يا توم..ربنا يحفظك
(يارب جيرى يطلع م التليفزيون ويضربك.. او النور يقطع بقى ونخلص...مفيش قناة جايبة نتيجة..اجيب لها قناة ايه بس؟؟)
..طبعا عمرى ماهجيب لها كورة..عشان ساعتها طنط بتتحول لمشجعة متعصبة اوى وتفضل تشتم وتزعق ولا العيال اللى فى الشارع..احسن حاجة اجيب لها مصارعة حرة..ولا بلاش..الطيب احسن ..اجيب لها  احسن برنامج يكون دمه تقيل عشان تزهق.. برنامج  علمى اهوا ويخنق والمذيعة بتتكلم عن الشاى الاخضر
طنط: والله مابحب الشاى الاخضر ده ولا بقبل له ريحة
المذيعة: ازاى كده .ده مفيد اوى فى التخسيس
طنط: ولا بيخسس ولا حاجة..ده كلام
المذيعة:لاء يا حاجة جريبه بس الاول(0اصل انا بتخيل المذيعة وهيا بترد على طنط لان طنط بتعلق على كل كلمة كانهم قاعدين سوا ع القهوة)..واللهى جارتى دى حلال فيها نشرة الاخبار..انا هجيب لها النشرة واحبسها لوحدها فى الاودة واهوا تشتم فى اوباما ونتينياهو براحتها..ويمكن شقتنا تكون متراقبة ولا حاجة ويجوا يمسكوها ونخلص منها..سلام يا طنط...انا هروح اتفرج ع الاعلانات فى الاودة التانية..موبايلات بقى..

وطارررررت البالونة!!

نزلت مع بنتى الصغيرة عشان نشترى شوية حاجات بسيطة للبيت...وقلنا ناخد المشوار مشى واهى رياضة والمكان قريب من البيت..ولمحت الراجل اللى بيقف يبيع بالونات فى الشارع..وده راجل معاه بالونات كتيرررررة طويلة كده ومبعجرة وحاولت ادخل من شارع تانى عشان اهرب منه لكن للاسف بنتى السوسة لمحته.(.يا مامى انا عايزة بالونة عشان خطرى.)...وحاولت اقنعها ان البالونة كبيرة اوى وهتلخمنا لكن مفيش فايدة وقربت من الراجل بتاع البالونات وقلت لها: يظهر انه نايم ..مفيش نصيب بقى ياللا بينا.....لكن الراجل ابن اللذينا نط من ع الكرسى وعايز يقولى(انت هتستعبطى)..ووجه الكلام للزبونة الصغيرة: عايزة كام واحدة يا امورة؟؟..نعم يا خويا هيا واحدة كفاية اوى عشان نعرف نشيلها..ومشينا من عنده والبنت ملخومة بالبالونة وماشية تخبط فى الناس .الاول خبطت فى واحدة ست حامل.الست صرخت فى وشنا: هوا انا ناقصة.....وشوية وخبطت بالونتها فى راجل كبيركده ومحترم..الراجل كان هيقتلنا.: مش عارفين تربوا عيالكوا خلاص بتخلفوا ليه؟؟..(ايه يا حاج انت هتدينى درس فى الاخلاق..دى بالونة يعنى مش طوبة وبعدين انا مدايقة منها اكتر منك)..ومشيت انا وبنتى والبالونة ويظهر ان الهوا كان جامد شوية والبالونة كانت هتطير  وبنتى ماسكاها جامد كانها ماسكة بندقية والهوا كل شوية بيزيد لغاية ما البالونة طارت..يا ربى البالونة طارت (الحمد لله)..وبنتى اتفتحت فى العياط والناس عمالة تشاور علينا وناس تقول امها ضربتها وناس تقول شكلها خاطفاها اصلها مش شبهها خالص لو ركزتوا( انت هتعمل فيها المفتش كرومبو؟ ) ..المهم الشاويش اللى كان واقف تقريبا صعبنا عليه ووقف كل العربيات مخصوص عشانا(راجل محترم الحقيقة..اه لو يعرف)..وقالنا عدوا بسرعة بقى..قلت له لاء احنا بندور ع البالونة. مش عايزين نعدى..!.طبعا سمعت ساعتها اروع كلام سمعته فى حياتى من الشاويش ومن العربيات وكله عمال يزمر ويصرخ ويدعوا علينا و اللى يقول البلد باظت يا جدعان واللى يقول هما الستات كده مايجيش من وراهم غير البلاوى..(ايه يا جدعان كل ده عشان بالونة واللهى انا زهقانة اكتر منكوا).وفضلنا وانا وبنتى نجرى بين العربيات كاننا بندور على عيل تايه..لغاية ماشفتها اهى منورة هناك اهى..فضلت تطير لغاية مااستقرت فوق اشارة المرور(بالونة منضبطة) حاولت انط عشان اجيبها بس ماطولتش وخفت اتكعبل واقع على وشى..قام الشاويش الغلبان(الله يعمر بيته) جابها ولسه هيديها لى طارت منى تانى.؟(معلش اتزحلقت منى)..المهم الشارع كله بقى يتنافس ع البالونة تقولوش فريق كرة طايرة..الكل بيجرى وبينط وعايز يلحق.(على فكرة لو وجهنا اهتمام الشباب للكرة الطايرة هننجح  اكتر من كرة القدم) والناس فرحانة بالبالونة كانهم ماصدقوا وبنتى شغالة عياط(يابنتى انا مدايقة اكتر منك)..والعربيات كلها وقفت تتابع المباراة..ولاقيت واحد بيقول لصحبه تقريبا فيه شخصية مهمة معدية(طبعا هوا فيه اهم م البالونة!)..وسمعت واحد بيتفلسف:احنا فى زمن البالونات(مش طالبة فلسفة خالص).ولاقيت اطفال عاملين مظاهرات(احنا كمان عايزين بالونات ).. المهم فى الاخر عشان مااطولش عليكوا احب اطمنكوا ان الفريق بتاعى فاز واخدت البالونة اخيرا...ودخلنا المحل عشان نشترى االطلبات..ربنا يعدى اليوم ده على خير يارب..هوا المحل زحمة ليه كده..اه اصل النهاردة الخميس...هوا فيه ايه يا جماعة كلكم متنحين للتليفزيون ليه كده؟؟..صاحب المحل قالى: اصل فيه عملية ارهابية حصلت فى شرم الشيخ...0(ليه كده بس احنا ناقصين)..وفجاة سمعنا فرقعة جامده اوى فى المحل..الناس اترعبوا..يا خرابى يا لهوى..الحقونا..عمليه ارهابية..قنبلة فى المحل...صاحب المحل خايف: انبطحوا انبطحوا كلكم.. وسمعت راجل بيقول للتانى: هما الارهابين ايه اللى جابهم هنا بس..وست بتقول لجوزها ف التليفون: الحقنى فيه متفجرات فى المحل..فيه ارهابين هنا..الحقنى يا مرسى.(وطبعا مرسى ماصدق يخلص م المدام)..وواحد كبير بيعيط وبيقول انا كان قلبى حاسس انى هيحصلى حاجة النهاردة..وسمعت واحد بيوصف لمراته فى التليفون شكل الارهابى المعتوه( هوا ده وقت اشتغالات برضه)..يا عينى الناس اتجننت خلاص.. بس الصراحة ماردتش اقولهم ان مفيش قنبلة ولا حاجة!! وان السبب هوا بالونة بنتى اللى فرقعت!(اصلها فرقعت غصب عنها والله..)...وخفت اعترف لهم  يبلغوا عنى البوليس وممكن مايصدقوش موضوع البالونة واكيد مش هيصدقوه طبعا وهيحولونى ساعتها على حد يكشف على قواياى العقلية ومش بعيد يودونى مستشفى الامراض النفسية والعقلية..ولو فضلت احلف لهم من هنا للسنة الجاية انها بالونة مش قنبلة مش هيصدقونى...عشان كده قررت انى اسيبهم  يعيشوا التجربة المثيرة دى.. يعنى بوليس وقنابل وارهابين...wow...حاجة جديدة برضه وروشة...وخدت بنتى وطلعنا نجرى قبل البوليس ما يجى...بس ربنا يستر بقى والراجل بتاع البالونات مايبلغش عننا

خمس شخصيات واستك

انا عندى اكتر من شخصية..بس مش معنى كده انى عندى كذا بطاقة..لكن اقصد انى بتعامل مع كل شخص حسب شخصيته يعنى الشخص المرح اللى بيضحك بكون معاه عسل ودمى خفيف واضحك عمال على بطال زى الهبلة..والشخص الرخم ودول كتيييييييير بكون رخمة معاه ده حتى بكون ارخم منه وافضل اتنافس مين فينا ارخم من التانى ؟؟..البنت اللى دمها تقيل بيكون دمى معاها اتقل م الفيل ابو زلومة..والبنت المتفائلة ببقى معاها متفائلة يمكن اكتر من ايليا ابو ماضى نفسه..والشخصية المتشائمة بكون متشائمة اكتر منها وافضل اقول مفيش فايدة مفيش فايدة ولا سعد زغلول فى زمانه....ساعات بقول لنفسى انا كده يبقى ماليش شخصية..انا مجرد رد فعل او صورة مستنسخة من اللى قدامى..لكن نفسى التانية ترد ع الاولانية وتقولها بالعكس انتى كده بتتكيفى مع كل الشخصيات انتى كده مرنة اوى..تقوم الشخصية التالتة جوايا ترد وهيا متعصبة اوى..انتى كده تبقى زى الحرباية كل شوية بلون... انا لسه ماعرفتكوش على شخصياتى..اصل انا جوة منى حوالى خمس شخصيات تقريبا..والشخصيات دى دايما بتتخانق مع بعضها وافضل اسلك بينهم اصلهم مش طايقين بعض خالص..اعرفكم بالشخصيات..اول شخصية دى مسئولة عن العلاقات العامة مع الناس.يعنى علاقتى باهلى واصحابى...ودى بتظهر اول مابتكلم مع حد او اقابل حد..وهيا دايما بتحاول تحسن من علاقتى بكل الناس..وتلفت نظرى اول مااتكلم بطريقة وحشة او اغلط فى الكلام او اتخانق مع حد وبتبقى هيا السبب..اصلها ساعات بتبقى متسرعة كده ومندفعة وبتتكلم كتير وبتغلط...متبهدلة اوى معايا الشخصية دى.
الشخصية التانية..وهيا المسئولة عن اتخاذ القرارات فى حياتى..اول مااجى اخد اى قرار سواء مهم او هايف الاقيها ظهرت..والشخصية دى اغلب كلامها ياريتنى .وانا اللى غلطانة..مكنتش اعرف..مااهى اصل اغلب قراراتها بتطلع غلط فى الاخر ودايما ندمانة طول الوقت
الشخصية التالتة..الشخصية المبدعة..ودى مسئولة عن الافكار والمواضيع وهيا الدماغ اللى بتجيب لى الالهام كله.ودى تعبانة اوى معايا..نفسها مرة فى اجازة م التفكير..ياعينى على طول عندها صداع ودايما سرحانة وبتفكر..
الشخصية الرابعة..دى احب شخصية ليا لانها شخصية ترفيهية..مسئولة عن الضحك والفرفشة..طول النهار تزن كانها طفلة صغيرة..عايزة اخرج..عايزة اتفسح..عايزة اسمع اغانى..فاضية بقى ورايقة وعايزة هزار طول النهار..بس محدش فاضيلها ..هيا الحياة كلها هتبقى لعب..
اخر شخصية ..بخاف وبتهرب منها..شخصية مثالية..وهى رمز الضمير..الشخصية دى بتخنقنى.طول النهار تعاتبنى وتبستف فيا حتى لو عملت حاجة كويسة..مفيش حاجة من تصرفاتى عجباها..زهقتنى..اجى اصلى..تقولى انتى سرحتى فى الصلاة..اتحجب..تقولى وده اسمه حجاب برضه..نص شعرك باين ولبسك ع الموضة..اجى اسمع اغنية من نفسى .تقولى كنتى اتفرجتى على برنامج دينى ينفعك..
دلوقتى مثلا انا عايزة اشغل الكمبيوتر شوية..اول شخصية بتاعة العلاقات العامة قالت لى:يعنى تسيبى جوزك قاعد لوحده وتطنشيه وتشغلى الكمبيوتر..
الشخصية التانية  بتاعة القرارات ماعجبهاش الكلام فقالت: ماتفكريش فى حد وخدى القرار وشغلى الكمبيوتر هوا انتى لسه هتفكرى.؟(مااهوا تسرعك ده ياختى اللى بيودينى فى داهية)
الشخصية التالتة بتاعة الشغل طلعت وقالت لى: كويس اهى فرصة تكتبى قصة ع الكمبيوتر وتستغلى الوقت فى حاجة مفيدة(ماشى يا ختى مش بتفكرى انتى الا فى مصلحتك)
الشخصية الرابعة الترفيهية قالت لى: بلا قصة بلا بتاع ماتوجعيش دماغك.هوا انتى لسه هتفكرى وتكتبى..ادخلى اسمعى لك كام اغنية كده وخليكى روشة.(بموت فى الشخصية دى وبعشق كسلها. ..حبيبتى حبيبتى .ودمها خفيف على قلبى اوى الصراحة..بس شخصيتها ضعيفة دايما تخسر فى الاخر نفسى مرة تمشى كلمتها)
الشخصية الخامسة الرذلة طلعت لى..شخصية مثالية بقى..قالت لى وهيا متعصبة: يعنى تسيبى بنتك تعيط وجوزك زهقان والمطبخ مكركب مواعين وتشغلى الكمبيوتر..روحى اسالى جوزك لو عايز يشرب حاجة ولا روحى لجارتكم الى ابوها مات عزيها  خلى عندك دم(نكدتى عليا يا شيخة ..دايما تفوقينى كده)..جوزى بيبص لى ومستغرب..بقى لى حوالى ربع ساعة متنحة للكمبيوتر..بيسالنى: انتى هتشغليه ولا لاء.مالك سرحانة فى ايه؟؟..قلت له: وانت فاكر ان تشغيل الكمبيوتر ده حاجة سهلة؟
الراجل هيتهبل: اضغطى على power...
قلت له: مش دى المشكلة بس اصل انا لسه مستنياهم لما ياخدوا قرار..
الراجل تنح وافتكرنى مخاوية جن ولا حاجة. وقعد يقول: لا حول ولا قوة الا بالله الست اتجننت. ....المهم فضلت فى الصراع ده حوالى نص ساعة وفى الاخر سبت الدنيا تضرب تقلب وسبتهم يتخانقوا مع بعض وقلت ادخل اجيب حاجة اكلها..وما استجبتش لنصايحهم فى انى  لو اكلت متاخر كده ممكن معدتى تتعبنى  ووزنى هيزيد وجوزى احتمال يكرهنى...وصرخت فيهم: جعانة وعايزة اكل بقى..؟جوزى قالى: ماتاكلى بالهنا والشفا ...اتعصبت عليه: هوا انا بكلمك انت؟؟..الراجل اتاكد رسمى انه عايش مع واحدة مناخوليا..(طبعا عارفين ان الشخصية الترفيهية هيا اللى قالت لى كلى براحتك واتخنى براحتك..اصلها شخصية عسل وقلبها عليا اوى")

خارج نطاق الخدمة

....ترن ترن ترن
-الووووو..ايوة يا محمد ازيك..اخبار الشغل ايه؟؟
-تمام الحمد لله خير فيه حاجة؟؟
-لاء ماتقلقش ..بس عايزة ادردش معاك شوية
-اههه..شكلك رايقة..انا موش فاضى..سلام دلوقتى وهكلمك لما افضى
-مااااااااااشى..ولا يهمك..سلاااااام
( هوا الشغل يعنى هيطير..!!الشغل ولا مراتك يعنى!!.مفيش برضه زى الام..انا هكلم ماما حبيبتى)
ترن ترن ترن..
-الووووو.. ازيك يا ماما..عاملة ايه؟؟
-ازيك انتى يا حبيبتى..وايه اخبارك؟؟
-انا الحمد لله كويسة عندى اخبار حلوة عايزة ادردش معاكى شوية..الوووو..ماما انتى رحتى فين؟؟
-معلش يا حبيبتى اصلى جارتى سامية عندى..بصى يا روحى لما تمشى هبقى اكلمك  وندردش براحتنا..اصل سامية دى قرارة وعينها وحشة اخاف تحسدك يا قلبى...
-ماشى ماشى..ولا يهمك خالص..سلاااااااام
( ادى الامهات يا ناس!!  جارتها اهم منى يعنى..امهات اخر زمن!!.هيا اختى حبيبتى اللى هتسمعنى..هوا فيه بعد الاخوات؟؟)
...ترن ترن ترن
-الووووووو..ازيك يا دودو..وحشااااااااانى موووووت
-بصى يا حبيبتى هروح اتابع الرز بس احسن يشيط
-طب ما توطى عليه وتيجى تدردشى معايا شوية
-لاء اصلى ايدى مشغولة وبقلى سمك..هكلمك بعد الغدا يا قمر
-لا لا براحتك براحتك..سلاااااام...
(خلى بقى السمك ينفعك ..تبيعى اختك عشان اكلة سمك اومال لو كانت بامية باللحمة كنتى عملتى ايه؟)
فيه ايه هوا محدش فاضيلى النهاردة..كلهم busy ...شكلى بقى وحش اوى...كلهم حاطينى علىwaitting ولا ايه؟؟... هيا بقى طلبت معايا اتكلم مع حد..يارب الاقى حد available....
...مفيش غير البت مروة صحبتى..رايقة وفاضية و مفرفشة وهتسمعنى
ترن ترن ترن
-الووووو..ازيك يا ميررررو وحشانى اوى ..فينك؟
-عايشة
-اوعى اكون معطلاكى عن حاجة ولا كده؟؟
-لا انا فاضية خالص..هوا انا بقى ورايا حاجة
-متاكدة؟
-يا ستى فاضية..اهى اهى اهىءء
-مالك بتعيطى ليه؟؟
-انتى ما عرفتيش اللى حصلى مش جوزى طلع بيخونى ..لا وبقى له سنتين وانا كنت نايمة على ودانى
(اه شكلها قلبت غم) معلش يا مروة ولا يهمك..المهم كنت عايزة احكى لك
-مش مهم ايه..يعنى بعد كل اللى عملته عشانه يعمل فيا كده؟؟ قليل الاصل وغدار..منه لله منه لله
-(ايه الجو ده؟؟..يا ستى انا مكلماكى عشان انا اللى اتكلم مش حضرتك)..سيبك منه بس واسمعينى
-ازاى يعنى؟؟ انا اكتر حاجة اكرهها الغدر..اصلك ما جربتييييييييش
-(الله اكبر..انتى هتقرى عليا يا ختى..انا غلطانة انى كلمتك..يا ريتك ما كنتى فاضية)..ما تزعليش نفسك..بكرة تتجوزى واحد احسن منه
-بعد ايه..بعد ما ضيعت احلى سنين عمرى
-(طب اعمل ايه..انا اتخنقت..انا كنت مفرفشة ..يعنى يا ربى الوحيدة اللى الاقيها فاضية برضه تطلع مش فاضية ..).. معلش يا ميرو ما تعمليش فى نفسك كده..كل الرجالة كده(اموت واعرف الست بتاعة لقد نفذ رصيدكم راحت فين؟)..ايه ده ايه ده..مين قليل الذوق اللى بيرن عليا دلوقتى..هوا ده وقته يعنى؟؟..هوا انا عندى كام مروة بس!!شكلى كده هكسر الموبايل ده وارتاح منه(لازم ابالغ بس عشان تصدقنى)
-خلاص بقى ما ترديش وخلاص
-(ده انتى باردة يا شيخة)...على رايك..ساعة الحظ ما تتعوضش ..استنى كده لما اشوف مين..ايه ده معقوله دى ماما اللى ع الwaitting..معلش بقى يا ميرو طلعت ماما..وانتى عارفة الا الام طبعا..انا اطنش وأcancel  اى حد الا امى حبيبتى..دى حملتنى فى تسع تشهر..لاء تقريبا سبعة بس...ورضعتنى كمان.. صحيح صناعى بس سهرت جمبى وكبرتنى...بصى يا روحى هرد عليها واكلمك تانى..اوعى تنامى..هكلمك على طووول....سلااااااااااااااااام يا حبيبتى ...(وابقى قابلينى لو عبرتك تانى)..انا خارج نطاق الخدمة..

عايزة اقعد مع نفسى شوية

نفسى اقعد لوحدى ولو خمس دقايق بس..بلاش خمس دقايق..تلات دقايق..دقيقة حتى..اسرح فيها مع نفسى..استرجع مثلا ايام الطفولة..استرجع ايام الجامعة..استرجع اى مواقف ظريفة فى حياتى..استرجع لحظات نجاح او لحظات فرح وبهجة..طب  بلاش الذكريات..افكر شوية فى مستقبلى..فى الحاجات اللى بفكر اعملها..فى مشروعاتى اللى ناوية انفذها..افكر فى احلامى واتخيل نفسى واخدة جايزة نوبل فى الادب...يا سلام..ابقى لابسة طقم شيك كده لونه pink اصلى بحب اللون ده اوى..وبعد كده اطلع ع السلالم واسلم ع الاستاذ اللى هناك (تقريبا يبقى ابن عم نوبل)..ويدونى جايزة فى علبة حمرا كده قطيفة وشهادة تقدير ولا حاجة عشان ابروزها واحطها فى اودتى..انام واقوم الاقيها فى وشى..يا سلام..يارب(ترن ترن..التليفون بيرن)يكونش عم نوبل بيتصل بيا؟ لالا مش قوى كده..(الووووووووو..)دى طلعت واحدة صحبتى بس رغاية اوى...يوووه طلعتنى م المود خالص ...خلصت معاها ورجعت احلم تانى ..حلمت ببناتى واتخيلتهم فى الكوشة بفستان الفرح..الله هيبقى شكلهم حلو اوى..وتبقى القاعة كبيرة وفيها بوفيه مفتوح كبير اوى.(عايز كوباية شاى؟)..ما ترووح يا سيدى تاخد م البوفيه..(بوفيه ايه؟؟)اههه اسفة اصلى سرحت شوية..انت عايز شاى..حاضر ثانية واحدة..وادخل اعمل الشاى لجوزى واكمل سرحان..اتخيل بنتى وهيا حامل وكعبورة كده..يا عسل دى هتبقى طعمة اوى..(كل ده فى كوباية شاى؟؟قدامك قد ايه؟)..تسع تشهر بس وهيعدوا بسرعة..(نعم تسع ايه انتى بتزرعى الشاى ولا ايه؟)..حاضر حاضر اتفضل اهوا...ويا سلام بقى لو جابت بنت او ولد..هيبقوا قمر زيها..وتسمى المفروض بنتها على اسمى والولد على اسم ابوها..ولا بلاش جهل..تسمى اللى هيا عايزاه مش عايزة اخنقها...ده عيالها اصلا هيبقوا سكررررررر..(انتى كمان مش حاطة سكر؟؟)...اه اه اسفة معلش..كام معلقة..(اتنين حلو اوى)..حاضر..ويا سلام لما تروح تطعم عيالها ويعيطوا وماتعرفش تنام منهم..(ايييييه انتى مش سامعة البت عمالة تعيط؟؟)...مين بنت مين ؟؟طب ماتديها لمامتها؟؟(مامتها؟؟اومال انتى تبقى مين؟؟)...معلش معلش..سرحت شوية(ايه موضوع السرحان ده؟؟ انتى بتفكرى فى ايه اوى كده؟)..المهم رحت للبت اللى بتعيط..ياااااااه ده انا كنت متخيلاكى شايلة بنتك دلوقتى وبترضعيها...كنتى أم حلوة وحنينة اوى..(واءواء واءءء) طيب اصبرى اصبرى..وتخيلت انى بتخانق مع جوزها:انت مزعل بنتى ليه؟؟ومش بتفسحها كتير ليه؟؟خد بالك منها بدل مااشوف شغلى معاك..(واءء واءءءءء)..يا بنتى اصبرى هجيب لك حقك اهوا..صبرك عليا:لازم تعرف ان انا مدياك اغلى حاجة عندى فى الدنيا كلها..(واااء وااءواءءءءءءءءء)..يا بت ماتعيطيش كده ماتخليهوش يحس انك ضعيفة..(فيه ايه البت جعانة عايزة ترضع..وبنتك التانية لبسيها عشان اخدها معايا وانا خارج..وانا بقى لى ساعة بدور على فردةالشراب مش لاقيها..وعايز كوباية شاى تانى )...حاضر ثوانى ثوانى..وانتى يا بنتى اهتمى بنفسك شوية كده وخليه يشوفك على طول حلوة بدل ما يبص لبرة..(الحقى البت وقعت من ع السرير)..يا حبيبتى..ركزى شوية كده وصحصحى..بلاش الخيبة دى!!شايفة اختك عاملة ايه مع جوزها..(يا بت ابعدى عن اختك يا بت هتوقعيها تانى).يا جماعة سيبونى احلم شوية ..سيبونى اخد جرعة احلام كبيرة اقدر بيها ااعيش الواقع واستحمله..هوا كتير خمس دقايق؟؟.(انا اتاخرت؟؟ مالقيتيش الشراب برضه؟؟)..حاضر حاضر..بلا احلام بلا وجع دماغ...!!

صورة وحشة

بموت انا فى الصور والتصوير..وبشهادة اللى حواليا انى عندى حس فنى فى موضوع الصور ده..يعنى بعرف اخد لقطات حلوة..مرة مثلا صورت اختى وجوزها صورة رومانسية اوى(صورتهم وهما ماشيين فى الشارع من ظهرهم)..بس عندى سينس برضه....يعنى مااصورش اى لقطة كده والسلام..ده شغل الهواة..لاء انا بصمم انا اللقطة واخلى بنتى تبص بصة معينة وتعمل حركة معينة وكلام من ده.وبعشق بقى الافكار والمناظر الجديدة...ما انساش برضه لما دخلت على ماما المطبخ وصورتها جمب البوتاجاز..من احلى صورها..كانت ساعتها بتطبخ ملوخية ولسه حتحط الطشة لقتنى داخلة عليها ..الست صرخت فى وشى..بس الصراحةالملوخية طلعت تجنن..قصدى الصورة يعنى.مرة برضه صورت ماما وهيا بتجرى ورا الصرصار بالشبشب.دى بقى من اكتر الصور اللى بعتز بيها.رغم ان اى حد بيشوفها مش بيقدر يفهم المغزى منها.لكن انا كان ليا مغزى واضح بالذات لان الشبشب لقيته جاه فى وشى فى الاخر.(ماما دى ليها حظ جامد معايا فى الصور)..اول بقى ما ولدت بنتى ماكنتش بسيب الموبايل..كل حركة اصورها..تضحك..تكشر..تتاوب..تنام..اى لفتة بجيبها ومخزناها..مرة واحدة قالت لى انتى كده مش بتستمتعى باللحظة اللى انتى فيها..كل اللى همك تصورى وخلاص..انتى ربنا خلق لك كاميرا طبيعية..عينيكى تقدرى تصور بيهم اى حاجة وتسترجعى الصور كمان فى الوقت اللى تحدديه..(تفتكروا كلامها اثر فيا..؟ولا كانها قالت اى حاجة..ادمان بقى نعمل ايه؟)وسبحان الله البت بنتى اتدربت .اول ماتلاقينى ماسكة الكاميرا..تقوم واخدة وضع التصوير على طول وترسم الضحكة على وشها الصغنون كانها بتعمل اعلان عن معجون سنان..واحلى حاجة فى التصوير هوا ان اللى بيصورك بيفضل معاك فى الصورة طول عمرك. يعنى كل ما هتشوف الصورة هتفتكر الشخص اللى صورك كأنه باين فى الصورة معاك زى المخرج كده بيعمل من خلف الكاميرا رغم انه مسئول عن كل كبيرة وصغيرة....مرة رحت اصور بنتى فى استديو تصوير..وطلبت من المصور انه يستنانى 5 دقايق بس اضبط لها شعرها...الراجل قلت له كده و طلع فيا: ما ضبطتيهاش فى بيتكوا ليه؟؟والله دى مش شغلتى استناها؟انتى مش رايحة بيها كوافير يا ست هانم..(ايه ده انا مااسميش هانم)...قلت له برقه: معلش سورى خالص..هيا عامة مش محتاجة حاجة..ماشاء الله عليها حلوة طبيعى..يرد ببرود: طب يللا خلصينا..
(انا طبعا بحاول امسك نفسى وافضل مؤدبة)..ياللا يا حبيبتى اقعدى عشان عموا العو ده هيصورك..طبعا البت اتفتحت فى العياط وفضلت تقول عموا ده يع عموا يع..(يا بت ابوسك ايديك اسكتى احسن الراجل يقطعنا..)..طبعا فضلت اقنعها بان عموا مش يع  .......بصى يا حبيبتى..عموا ده حلو خالص ومش بيعض ماتخافيش.هوا شكله كده..والبت ابداااااااااا شغالة عياط...(والله صعبت عليا وحسيت ان انا السبب فى اللى هيا فيه ده )..المهم حاولت اطلب من اخينا ده انه يحاول يضحكها ويعودها عليه زى اى مصور مابيعمل..يعنى يقولها يا حلوة يا بطة يا قطة..الراجل طلع فيا: واللهى ده مش شغلتى ياماما(جاك مو مامة ايه ؟؟انت خليت فيها ماما ولا بابا)..انتى ضحكيها ولاعبيها ورقصيها براحتك..انا شغلتى اصور وبس..(..ايه رقصيها دى شايفنى ماسكة لها طبلة فى ايدى)..خلاص بقى يا حبيبتى ماتخافيش هتتصورى ونروح على طول..ماشى(انا اللى بقولها)..طبعا البت غرقانة فى دموعها وعينها دبلت خالص وشعرها اتنكش وشكلها بقى عيضة..وقلت له: خلاص صورها كده وخلاص..اى حاجة بقى(وانا اللى استاهل)...قام قايلى بصوت عالى مجلجل اوى :لاااااااااا..لا يا ختى(مستوى الحوار معاه عمال ينزل خالص)..انتى هتستعبطى انتى وبنتك..يعنى تنكشى شعرها وتعيطيها وتقولى صورها..عشان تطلع الصورة وحشة بعد كده وتقولوا ان تصويرى اللى وحش فى الاخر..يعنى بعد كل تعبى ده وتضيعوا سمعتى..ده انتوا عالم مفترية..عارف انا الاشكال دى عارفها وحافظها..وعارف مين اللى مسلطكم.!!.الصراحة بقى مقدرتش امسك نفسى ساعتها محدش يحوشنى لو سمحتوا:طب انت عارف ان اغلب استديوهات البلد معلقة صورتها برة فى الفاترينة ده غير ان الفنان عادل امام كان عايزها تلعب دور بنته فى فيلمه الجديد.عارف عادل امام ولا مش عارفه؟؟..الراجل بص لى بقرف: انتى هتشتغلينى؟؟من امتى عادل امام بيجيب عيال صغيرة فى افلامه؟؟...لا يا راجل(انا بكلم نفسى)..ياللا ع العموم انت كنت هتدخل التاريخ من اوسع ابوابه بس مالكش نصيب بقى!!.(الهى يارب يوعدك بكاميرا بايظة وفلاش مابينورش وفيلم حمضان وتتخبط فى تلات بروايز فى وقت واحد وماتلاقيش ولا عروسة فوتو جينيك تصورها والعريس يجى يتصور عندك وينسى العروسة قادر يارب..ويعقدك زى ماعقدتلى البت البريئة دى)...البت يا عينى من يومها كل ماتشوف اى ضوء..فلاش كاميرا..موبايل..ضوء شمس حتى..بيجيلها انهيار عصبى..(منك لله يااللى فى بالى) المهم استلمت الصورة منه ولقيت لها استخدام روش اوى..بقيت بستخدمها فى تخويف بنتى..يعنى كل ماتعمل حاجة غلط..اقولها:(ها ..هتعملى كده ولا اوديكى عند عموووووووووووا..)

ام العيااااااااااااااااال

يا عينى على ام العيال..غلبانة واللهى..تسكت فى الواد ده..يطلع ده..تنيم فى ده..يصحى لها ده..تاكل ده..وبعدين تلاقى التانى رجع اللى اكله..غلبانة والله..وتحس يا عينى ان دايما عندها صداع ودايما رابطة دماغها بطريقة عجيبة اوى..وعلى طول عندها احساس انها دايخة..كان حد ضاربها على دماغها..وتمشى كده فى الشقة تتخبط..(عشان كده لازم نراعى ام العيال ونجيب لها شقة واسعة بدل ما الست بقت شرك كده)..وتلاقيها دايما فى حالة سرحان..اللى يشوفها وما يعرفهاش..يقول يكونش الست دى بتحب ولا ايه..؟؟ما بقتش بتركز كده وسرحانة وسهرانة طول الليل تفكر فى عشيقها..(العبيط اصله مايعرفش انها سهرانة طول الليل جمب العيال المقاريض دول)..وتلاقى الست الغلبانة لا بقت بتقرا جرايد ولا مجلات واصبحت عايشة فى دنيا غير الدنيا(حلوة اصبحت دى)...وكمان فلوسها اللى بتاخدها من الاخ جوزها بتخلص على طول تقولش الفلوس فيها عفريت..والراجل بقى يشك فيها..(هيا بتخلص فلوسها كده اول باول فى ايه بس هموت واعرف..الست دى بتضيع فلوسها على مين بس..ده انا هشرحها النهاردة)..ومايعرفش اصله الاسعار بقت عاملة ازاى؟؟وما يعرفش البامبرز اللى طول النهار تشتريه لعياله..ده غير اللبس والاكل واللعب وفواتير النور والكهربا والمية والتليفون..مسكينة بجد..(مسكينة ايه ده انا كل ما ادخل عليها الاقيها بتلغ فى الاكل..اتاريها بتخلص الفلوس كلها فى الاكل)...اصله الراجل معذور ..فى ايام الخطوبة يلاقيها بتاكل شكولاتة..وهوا يسالها برقة: انا مش عايزك تتخنى يا روحى..(لاء اتخن ازاى دى شكولاتة دايت ماتخافش)..وفى الجواز..يجى يكلمها فى موضوع يلاقيها ماسكة صوباع محشى...يلفت نظرها: خدى بالك ما تكتريش من المحشى يا حبيبتى!!..(لا لا ماتقلقش انا اصلى بس عندى ملل وبضيعه فى الاكل)..وبعد ما تبقى حامل..يدخل من باب الشقة يلاقيها بتاكل فتة كوارع..يسالها بهدوء: ازاى واحدة برقتك تاكل كوارع وفتة!!..(ايه فيه ايه؟؟مش باكل لاتنين؟ انا وابنك؟)..يبقى عايز يقولها انتى بتاكلى لتنين مش لاتنين!!المهم الحمد لله الهانم ولدت..واجب بقى تبطل اكل شوية..الراجل لسه بيكلمها لقاها مسكت صينية بطاطس باللحمة ونازلة لغ...الصراحة الراجل اتخنق منها: يا ستى ارحمى نفسك شوية..مش شايفة شكلك بقى عامل ازاى؟؟( ايييييييييه لازم اكل كويس عشان برضع.)..بترضع!!بترضع فيل دى ولا ايه؟؟..وبعد حوالى سنتين..يسالها بتفاؤل: الحمد لله انا جت لك بعد سنتين بالثانية..اظن مفيش خلاص رضاعة..ايه بقى طبق الكشرى اللى فى ايدك ده؟؟بيعمل ايه فى ايدك؟؟(هوا انا ما قولتلكش؟؟)..لا يا حبيبتى ما قولتليش؟؟(مش انا حامل تانى!!مبروك يا حبيبى..يتربوا فى عزك..)..ااااااااااه قصدك يتربوا فى كرشك...وتقولوا غلبانة دى تغلب بلد..

الستات عايزة ايييييييه؟؟؟

انا هتكلم عن الستات باعتبارى واحدة منهم يعنى..ولو انى مش هقدر اعبر عن كل الستات..لكن على الاقل هعبر عن الستات اللى حواليا واللى انا شايفاهم وشايفة معاناتهم..واقدر بكل بساطة اقولكوا الستات عايزة اييييييييه؟؟
اول حاجة الست نفسها تلاقى جوزها مهتم بيها..يعنى مهتم بكل تفاصيل حياتها..من اول شكلها ومظهرها والنيو لوك بتاعها(ياخد باله ان بقى فيها حاجة غريبة)..ويهتم بصحتها وباخبارها وبنفسيتها.يعنى يهتم انها تكون سعيدة كده وفرحانة على طوووووووووول..تابع معاها المسلسل العربى اللى بتحبه(معلش هوا مسلسل يخنق بس تعالى على نفسك شوية)
تانى حاجة نفسها تحس ان جوزها ده راجل كريم معاها فى كل حاجة..يعنى مايبخلش عليها بكلمة حلوة بعد حاجة كويسة عملتها..او حتى من غير ما تعمل حاجة خالص.
مايبخلش بهدية حلوة فى اى مناسبة ليهم..او حتى من غير مناسبة خالص(اديها الهدية وبعدين فكر فى السبب بعدين)..مايبخلش بضحكة فى وشها تخليها تستحمل اى حاجة فى الدنيا عشانه...
تالت حاجة الست نفسها ان جوزها يتكلم معاها..نفسها يسيب الريموت كنترول من ايده ويركز معاها شوية..نفسها يديها وقت وتركيز زى مابيدى وقت لشغله واصحابه ولاهله وللتليفزيون..نفسها يتكلم معها ويناقشهاوياخد رايها ويحكى لها اى موقف .(حتى لو هيكلمها فى الكورة بس يتكلم وخلااص)
رابع حاجة الست بتحلم ان جوزها يساعدها..يساعدها فى تربية الولاد..يساعدها فى السهر معاهم..يلعب معاهم مرة بدالها..يساعدها فى المطبخ حتى لو هيعمل بس طبق سلطة !!..
خامس حاجة الست نفسها ان جوزها يسمعها..مش لازم يا سيدى تتكلم معاها..بس على الاقل اسمعها بشوية اهتمام..شاركها فى اهتماماتها..حسسها انك مستمتع بكلامها معاك(تخيل انك بتسمع الست ام كلثوم مش الست مراتك)
سادس حاجة انك تتكلم حلو عنها قدام اهلها واهلك..وتبقى دايما فخور بيها وما تسخفش منها وما تتريقش عليها وما تحاولش تقلل منها ولا من اهتماماتها ولا تحقر منها ولا من عقلها وتفكيرها(ما اهى لو كانت بتفهم فعلا ماكانتش اتجوزتك).
سابع حاجة..الست بتحلم براجل دمه خفيف ولذيذ وحبوب..وما بتحبش الراجل النكدى..حاول تبقى ظريف معها وتضحكها..وتسمعها فى نكت وتحكيلها مواقف طريفة طول الوقت.عشان تخفف عنها وتنسيها الهم..(خليك اراجوز يعنى).
تامن حاجة ..الست نفسها جوزها يطبطب عليها ..ويقولها ربنا يخليكى ليا..ده انا من غيرك ولا حاجة..(ممكن انت تفتكر انها حاجة تافهة بس هتفرق معاها اوى)
تاسع حاجة الست نفسها جوزها يغير عليها اوى..يغير عليها من صحابها واهلها..يغير عليها من هدومها!!.يعنى تحس انها متجوزة راجل مش (كيس جوافة)
اخر حاجة الست هتموت وجوزها يفاجئها..تعالى نسافر دلوقتى حالا..او تعالى نخرج نروح مكان اول مرة نروحه بقالنا كتير ماخرجناش سوا..فاجئها برسالة حلوة على الموبايل..فاجئها بكلمة (بحبك) فى عز ما هيا تعبانة ومشغولة...(هتنسيها تعب اليوم كله)..
عرفتوا بقى ان الستات طلباتها بسيطة لا هيا طلبت مجوهرات ولا قصر ولا رحلة لجزر القمر..كل اللى نفسها فيه شوية حب ودفا ومشاركة و طبطبة ووردة حمرا يوم الفالنتين

فرح

ايام ماكنت فى الكلية اتعرفت على بنت عسولة اوى وشكلها بنت ناس واتكلمنا كتير اوى ....وبعد شوية بسالها السؤال الطبيعى:انتى اسمك ايه؟؟..الحقيقة البنت ارتبكت اوى..انا كمان استغربت..وسالتها تانى(ما انا اصلى رذلة)..:اسمك ايه؟؟
البنت وشها احمر وقالت لى:انتى اسمك ايه؟
قلت لها: اسمى رانيا..
قالت لى بحسرة كده: يابختك اسمك حلو..انا اسمى وحش اوى ماينفعش اقوله..
انا طبعا بقى فضولية اوى وده اللى مودينى فى داهية..وفضلت اتحايل عليها واجبها يمين واجبها شمال..فى االاخر خالص قالت لى: هوا اسم له علاقة بالكلية بتاعتنا..(هيا كده بقت سهلة يعنى)..احنا كلية سياحة وفنادق..هيكون اسمها ايه مثلا..اثار..بس اثار اسم حلو..يمكن اسمها نفرتيتى..بس ده اسم جميل ده معناه (الجميلة اتت)..حد يطول يبقى اسمه كده...ويقولوا الجميلة اتت والجميلة اتغدت والجميلة اتجوزت..والجميلة عندها برد..اهاه يمكن اسمها كليوباترا..ومعناه ظريف برضه(اللى ابوها مجيد)..يمكن فيه مشكلة بينها وبين ابوها ولا حاجة..محدش عارف..ولا يمكن مكسوفه عشان اسمها ضار بالصحة!!..المهم انا معرفتش اسمها برضه فى الاخر..ولغاية دلوقتى كل ماافتكر ابقى هتجنن..اصلها كمان مكانتش دفعتى والا كنت عرفت اسمها بسهولة..ماعلينا..يارب تكون دلوقتى غيرت اسمها..اصل فيه واحد برضه غير اسمه من عنتر  ل عمرو..بس على فكرة كل واحد له من اسمه نصيب..يعنى البنت اللى اسمها لطيفة بتلاقيها فعلا لطيفة وظريفة..والبنت اللى اسمها ندى تلاقيها رقيقة زى قطرات الندى....واللى اسمها تغريد تلاقى صوتها حلو..والولد اللى اسمه (احمد) او( محمد) بيبقى حامد ربنا وراضى.  اسم (على )  بقى معناه واحد فى مكانة عالية وكل بقى اللى اسمهم حلا وزينة وجميلة غالبا بيكونوا حلوين وقمرات..واحدة اعرفها سمت ابنها( فادى)..بس ياعينى الولد كان متبهدل خالص..بتقول انه اى حاجة بتحصلهم هوا اللى بيفديهم..يعنى تصيبهم عين او تحصلهم حاجة وحشة ماتجيش الا فى الطفل البرىء ده..خدت قرار وغيرت اسمه..سمته( ناجى)..يعنى عشان ينجو بنفسه من اى حاجة..بس برضه لما كانت بتحصل اى حاجة وحشة..هوا اللى كان بينجيهم بدل ماينجو  هوا وينفد بجلده...قررت بعد كده تسميه (سالم) عشان ربنا يسلمه ويحفظه...الناس كلها قالت لها انتى فاكرة لو غيرتى اسمه حاله هيتعدل..دى جينات يا ماما..المهم فى الاخر هيا قررت تسميه اسم يقدر يواجه بيه مصيره المشرق ده..سمته (ضرغام):يعنى الاسد الشجاع..وطول النهار بقى شغالة ضرغام جاه وضرغام راح..المشكلة دلوقتى بقى فى حاجة تانية خالص..انها مش لاقيه له اسم دلع لغاية دولوقتى..انا اقترحت عليها كام اسم كده منهم ضرغومتى وضوضو وضيدو...حضرتى بقى سمعت الحكاية دى وانا حامل فى بنتى التانية..وكنت ساعتها فى الشهر التاسع..وفضلت محتارة اصل الاسم اللى هسميه هوا اللى هيحدد مصيرها...اسميها ايه اسميها ايه؟؟ هسميها(بشرى)اسم حلو وكله بشارة ...وتبقى كل ماتدخل على حد يجيله خبر حلو كانها جود نيوز كده متحركة..لالا..مش اوى كده يعنى..ممكن اسميها (وردة) اسم جميل اهوا وكله رومانسية ..بس ماهوا الوردة بتدبل برضه..ياخوفى ساعة ما اسميها الاسم تكون الوردة دبلت..اعمل ايه ساعتها بقى.ده انا كمان هولدها فى بداية الخريف!!.خلاص انا اسميها اسم مفيد ..عشان الناس والبلد كلها تستفيد منها..هسميها(ديمة) يعنى المطر الخفيف..واهوا تنفع فى ايام الجفاف اللى احنا مقبلين عليها..نبقى قاعدين كده فى اى مكان نلاقى مطر حوالينا..بس ده كده البت هتتغرق مية..طب ممكن اسميها(افكار)واهوا استفيد منها..تلهمنى بقى بكام فكرة حلوة كده اكتبها.والناس تنده لى يا امو الافكار..بس هيا البت البريئة دى ذنبها ايه تفكر وتتعب نفسها معايا.مش كفاية انا قربت اتهبل خلاص...يبقى كمان انا والبت..وحرام برضه افرضى حد اتريق عليها وقالها افكار ولا افتكارولا تذكار!!أجيب للبت عقدة نفسية يعنى!! استفيد انا وهيا نفسيتها تتعب!! .انا سمعت اسم غريب من فترة..اه اه(تماضر) بس لما سالت عن معناه قالولى:ذات عيش مضيراى ناعم بيضاء اللبن الحامض الطيب السناء الشكر(واللهى ما انا فاهمة حاجة)هوا انا اسميها اسم يقرفنى انا!!.خلاص هسميها (روانى) جمع رانية يعنى حسنة الصوت..طب وانا عايزاها تبقى حسنة الصوت ليه ؟؟هيا هتغنى..وبعدين مش عارفة ليه الاسم كده مفكرنى باسم سمنة..خلاص اسميها (لورا) وده اسم هضبة واهوا تنافس عمرو دياب فى اللقب بتاعه...بس مش عارفة مستصعباه وبعدين انا عندى مشكلة فى حرف الراء واللام..وما ينفعش فى عز ما انا متعصبه عليها اقولها اسكتى يا بت يا (يويا)..كده حتى البت مش هتحترمنى..وعمرها ماهتسمع لى كلمة..ممكن اسميها(حنان)حتى تبقى حنينة على امها حبيبتها..بس انا كنت اعرف زمان واحدة اسمها حنان وكانت معقدانى..لالا..افكر تانى...خلاص خلاص..لقيت الاسم اللى هيسعدها ويهنيها باذن الله..اسم كده يشمل كل حاجة فى الدنيا..يعنى اسم عام وشامل ....وكله سعادة وانبساط وسرور..ماتخافوش مش هسميها مبسوطة..ليه هوا انا اتهبلت؟؟.هسميها(فرح)..اظن اسم زى الفل...وربنا يفرحها يارب

تلات رسايل

الرسالة الاولى: من زوج لمراته..رسالة ع الموبايل...وحشتينى اوى..
الزوجة كانت ساعتها مشغولة فى المطبخ وايدها اصلا مبلولة..وبعد ماطبخت راحت تاكل العيال وتحميهم وتنيمهم..وبعدين قعدت تنظف فى الشقة ..كنستها ومسحتهاورتبتها..وبعدين راحت تتوضا وتصلى..وبعدين بصت لنفسها فى المرايا..شكلها مبهدل خالص..بس كله يهون عشان خاطر العيال..قعدت ترتاح شوية عل الكنبة..مسكت الموبايل..(لديكى رسالة)..من جوزك(my husband)..وحشتينى اوى..
الست تنحت وقالت فى سرها:ماتشوفش وحش...!!..وردت عليه برسالة تانية: ماتنساش تجيب صابون ومسحوق غسيل.!!
زوجة تانية..عند الكوافيرة..صبغت شعرها..وحطت المانيكير..وراحت تشترى شوية حاجات..لبس وشوزات وكام مجلة تتسلى فيهم فى البيت..واشترت العصير الدايت اللى بتحبه..وركبت عربيتها..موبايلها رن..(لديكى رسالة)..من جوزك(my baby):..وحشتينى اوى..
مراته ابتسمت وفرحت وبعد دقيقة سكتت..مابعتتش رسالة..بعتت له رسالة عصبية اوى : (من امتى بتبعت لى رسايل رومانسية؟اكيد انت باعتها لواحدة تانية وجاتلى بالغلط!!ربنا عايز يكشفك)
جوزها رد برسالة تانية: (تصدقى .انا غلطان انى عبرتك)..
زوجة تالتة..ماكانتش بتعمل حاجة..كانت بس ماسكة موبايلها ومستنية ان جوزها يبعت لها رسالة..كانت ساعتها بتفكر فيه هيا كمان..وعايزة تقوله انه وحشها..اول ماوصلت الرسالة..(my love)..وحشتينى اوى...ماردتش عليه برسالة..لكن اتصلت بيه وقالت له: وحشتنى اكترررررر

خلى بالك من كلامك

الدنيا دى يا جماعة زى الكورة..مرة تشوطها ومرة تشوطك..مرة تطلعك برة ومرة تيجى فى وشك او عينك..ومرة تانية توقعك ع الارض..وهيا بتجرى بقى ياتلحقها يا ماتلحقهاش..وكل ماتشوط كويس كل ماتكسب..لكن لو استعبطت بقى وماركزتش الكورة هتضيع منك خالص..اصل كل فعل له رد فعل..تشوط حلو تكسب وتدخل اجوان كمان..تشوط وحش تخسر..وتطلع م التصفيات ...وهيا الدنيا كده..ماانت اى حاجة بتعملها بتترد لك..حلوة بقى او وحشة..اهى بتترد وخلاص زى ماهيا بالضبط..يعنى انت سيادتك دلوقتى قلت لحد كلمة وحشة ..بعد شوية بقى ان مكانش فى ساعتها يعنى هتسمع نفس الكلمة اللى انت حدفتها فى وش صحبك الاولانى الغلبان ده..اصله مش شرط خالص ان نفس الشخص يرد عليك..ده ممكن يجى شخص تانى كده متبرع او مندوب عنه يرد عليك..وماتفهمش مندوب عنه ان الشخص ده قريبه مثلا او صحبه ولا هوا اللى موصيه .!!لا واللهى... ..بس ده شخص ربنا بعته عشان ياخد حق الشخص الاولانى..اصل فيه ناس بتاخد حق ناس..يعنى الكلمة اللى بتطلع منك ..بتفضل تلف تلف وتقوم بعد كده راجعة لحضرتك تانى..مش مهم بقى هترجع لك عن طريق مين..المهم انها هترجع لك تانى وخلاص..خليك عارف كده..مش بقولكوا كوررررررررررة...اومال انت فاكر ايه.؟..يعنى تحرق فى دم الناس وتغيظهم ..ومش عايز حد يرد عليك؟..وسبحان الله انت تغلط فى حق شخص..والشخص ده يطنش او يكبر او يزعل فى قلبه او يسامحك او يدعى عليك او حتى ينساك خالص.....لكن ربنا بقى مابينساش ابدا..وهتفضل الكلمة دى متشالة لك لغاية ماتطلع لك فى الوقت المناسب..الوقت اللى ربنا يحدده..اصل ربنا عادل اوى وقريب اوى وحاسس بالناس كلها..وعارف مين بيدايق مين ومين بيغيظ مين؟ومين بيغلس على مين؟؟قال صلى الله عليه وسلم " البر لايبلى والذنب لايُنسى والديان لايموت.اعمل ماشئت كما تدين تدان"
طب انا ليه بقى ازعل واتدايق!!مااهوا بعد شوية هوا كمان هيدايق..وهيدايق اوى كمان..ده يمكن حتى هيدايق اكتر منى!!....لوانت بقى عايز الناس تعاملك حلو؟؟الحل انك تعاملهم حلو..سهلة اوى على فكرة..عايزة تسمعى كلام جميل اوى.؟يبقى لازم تقولى كلام جميل اوى..عايز دمك يتحرق شوية ع الصبح!!ولا يهمك سهلة برضه..احرق فى دم الناس وغلس عليهم وغيظهم..انا عن نفسى شفت مواقف زى دى كتيرررررررررررررر..شفت اللى بتغيظ صحبتها اللى اتخطبت قبلها والتانية اللى بتعاير جارتها اللى حملت قبلها..واللى بيغيظ صحابه بعربيته الجديدة او شغله او شقته اللى ع البحر او رصيده اللى فى البنك ..وات افر يعنى..ده انا كمان شفت اللى عمال يغيظ صحبه بالمنصب اللى هوا فيه..اللى بعد شوية اتفصل منه!! واشتغل مكانه واحد تانى..هيعايره برضه زى ما عمل مع الاولانى!!(ماهوا اللى بدأ)حد قاله يطنطط عليه...عشان كده انا مش بحب ارد على اللى يغيظنى او يحاول يجرحنى..اصلى هرد ليه..؟؟مااهوا ربنا سبحانه وتعالى هيبعت حد كمان شوية يرد بدالى على نفس الشخص اللى جرحنى..ليه بقى اتعب انا فى نفسى واعصابى؟هوا انا غاوية تعب..الايام اهى دوارة وبتلف..والكلام كمان بيلف معاها..زى الكورة بالضبط..عشان كده اقترح ان اى حد عايز يقول لحد حاجة يعدالاول  من واحد لعشرة..ويفكر بالراحة شوية ياترى لو قلت الكلمة دى ايه اللى هيحصل؟وحط نفسك مكان الشخص اللى قدامك..وانت فى ايدك بقى مغناطيس ياتجذب نحيتك الكلام الحلو ياالعكس..انت وحظك..اقصد انت وكلامك..خلى بالك من كلامك

عربيتين ورا بعض

من كام يوم كده كنت نازلة رايحة مشوار..(مش لازم تعرفوا كنت رايحة فين..مش كفاية بدى لجوزى تقرير)المهم عايزة اقولكوا ان الدنيا بقت زحمة اوى..وعشان تنزلى لوحدك وتاخدى تاكسى..دى لوحدها مأساة!!المهم وانا واقفة كده ومستنية الفرج..لاقيت تاكسى معدى قدامى ..ولفت نظرى اوى شكل البنت والولد اللى كانوا راكبين..شكلهم كده مخطوبين..اصلهم قاعدين مكسوفين اوى..والبنت بتبص له برقه زيادة عن اللزوم وبتضحك نص ضحكة كانها خايفة ان سنانها تقع..والولد ماسك منديل ورق وعمال يمسح فى عرقه كانه كان بيخبز فطير قصاد الفرن..وشه محمر يمكن اكتر من البنت اللى جمبه..ونظراتهم لبعض فيها حب وخجل حلو اوى..وحسيت انهم بيبصوا لبعض اكتر ما بيتكلموا..واغلب كلامهم بالنظرات والهمسات..طبعا انتوا مستغربين انى لحقت اشوف كل التعبيرات دى..ماتستغربوش!!بقولكوا الدنيا زحمة والعربيات تقريبا ما بتتحركش..ياللا يا مسهل..الاشارة فتحت..والعربية عدت من قدامى..الصراحة كنت مبسوطة وانا شايفاهم..المهم لما احاول اوقف اى تاكسى لانى اتاخرت اوى..بس للاسف ولا تاكسى فاضى..ومرت قصادى عربية تانية...فيها راجل وست..شكلهم متجوزين..صوتهم عالى اوى..متهيالى كل العربيات سمعتهم وعرفت سبب الخناقة..شكلهم متعصب وكل واحد قاعد مدى ظهره للتانى..ولما بيبصوا لبعض بيزعقوا ويصرخوا..متهيالى حتى ان السواق اشترك معاهم فى المناقشة..نظراتهم الصراحة مفيهاش اى حب ولا رومانسية!!.المهم شوية والراجل اتعصب وجاب اخره وساب لها التاكسى ونزل..(كانت فرصه انى اروح اركب مكانه)..المهم هيا فضلت تزعق ومسكت كيسة الطماطم اللى فى ايدها وقعدت تحدفه بيها(حرام عليكى ده كيلو الطماطم بقى ب 8 جنيه)..والراجل ماشى متنرفز ومتغرق طماطم ..وهيا فضلت تعيط..وانا احاول اهديها...والاشارة فتحت ومشينا بالعربية..ولمحت العربية الاولانيه..لسه نظرة الحب موجودة بينهم...البنت لسه مكسوفه والولد لسه بيمسح فى عرقه...معرفتش احسدهم ولا اخاف عليهم.!!.خايفة يكونوا بيمثلوا على بعض .او يكونوا عايشين فى الوهم! خايفة حبهم يقل او حتى ينتهى خالص او يمكن خايفة يكون مصيرهم نفس المصير اللى انا شايفاه دلوقتى..والصراحة صعبوا عليا اوى.. يمكن حتى صعبوا عليا اكتر من التانيين...ودعيت ربنا..دعيت انه يحفظهم ..واتمنيت انهم يقدروا يحافظوا على حبهم ولو مقدروش يحافظوا عليه يبقى على الاقل يفضلوا يحترموا بعض وما يحدفوش بعض بالطماطم...

كلام ينرفز الرجالة

اما الستات دول..عليهم شوية كلام..يجيب الضغط..والسكر والمرارة كمان ..الراجل جوزها يبقى جاى تعبان من الشغل تقوم دى تقوله: انا عايزة اخرج!!..على فكرة دى من اكتر العبارات اللى بتنرفز الراجل..وبعدين هيا غبية الصراحة..ده وقته..الراجل مابقلوش ساعة داخل البيت..وبعدين مااهو بيخرجها كل اربع سنين مرة..فين المشكلة بقى؟؟ولا هيا الدنيا طارت؟؟....وبعدين الراجل يبقى تعبان وعايز ينام..تقوم دى داخلة عليه زى عمله الرضى..:انت بتحبنى يا فوزى؟؟يعنى بالذمة ده كلام..اكيد طبعا مش بيحبك..قصدى اكيد بيعشقك..مش مراته وام عتريس الصغير...وبعدين ايه يعنى اللى هيخليه مايحبكيش؟؟ طول النهار قاعدة اهوا على سنجة عشرة وناكشة شعرك وريحتك بصل وتوم..يعنى الراجل معندوش حتى اى مبرر انه يبص لبرة..ولا هيا يعنى طفاسة؟؟.وعلى راى المثل حبك فى قلبى يا بهيه زى حب الاقرع للكوفية!!وعجبى!!......وبلاش بقى تساليه فى الاسئلة العبيطة دى زى ايه اكتر حاجة بتحبها فيا؟؟ يعنى بلاش تحرجى الراجل..هوا عايش ومستحمل..وبيقول اهى ايام وبتعدى..ماتقلبيش عليه المواجع بقى..خليكى ذكية كده..واوعى بقى تقولى له انت مش رومانسى خالص وكده..والكلام بتاع البنات اللى عندهم 12 سنة دول..عيب انت كبرتى ع الكلام ده..المفروض تبقى اعقل من كده..وبعدين هوا فيه رومانسية اكتر من كده..ما الراجل اهوا طول النهار بيغنى ظلموه.و.فوق الشوك..طب بذمتك؟انا راضية ذمتك..حد بيغنى الاغانى دى دلوقتى..طب تصدقى انتى محظوظة..ماتحكيش لحد من صحابك بس احسن يقروا عليكى..وبلاش تتفرجى على فيلم تيتانيك كتير وتقعدى بقى تحقدى ع البت روز والواد جاك ..اهى السفينة غرقت فى الاخر اهوا..ارتحتى؟؟,وانصحك بقى انك تبداى تتابعى فيلم الزوجة التانية والحب الضائع ومهمة صعبة الجزء الاول والتانى.!!وما تفضليش تقولى ده ساكت ومابينطقش  وموش بيتكلم معايا خالص ..ليه مش كل مايشوف وشك يقولك انا عايز ادخل انام..وبعدين هوا هيتكلم معاكى فى ايه يعنى يكونش هيحل مشكلة التعليم فى مصر..!!واوعى تساليه انتى حبيت كام واحدة قبلى؟؟اصل هوا السؤال اصلا المفروض يكون:..انت حبيت كام واحدة بعدى او خونتنى مع كام واحدة؟؟ولو قالك: كتير..يبقى اكيد بيهرج معاكى ..مايبقاش دمك تقيل بقى..هوا يقدر يبص نص بصة لوحدة تانية!!  ومش لازم تمسكى موبايل الراجل وتفضلى تقلبى فيه..وكل ماتجيله رنة تسأليه مين اللى بيرن عليك؟ الحكاية دة بتعصبه اوى...بتعفرته...وبعدين انتى مش متجوزة رئيس وزرا يعنى مش هتلاقى جايله ميسد كوول من اوباما ولا هيلارى كلينتون..ده كبيره ميسد من الست عفاف جارتكم ولا من عم عزت بتاع الفول!!وعشان خطرى بلاش موضوع انت مش بتجيب لى هدايا ومش مهتم بيا والحوار ده كله....انا فاكررة اخر مرة جاب لك هدية كان من حوالى ست سنين تقريبا وكان جايب لك قرد اسود كبير كده عشان يخضك فى الظلمة... طب تصدقى بقى ان انتى مفترية..ومابيطمرش فيكى!!.. وبلاش تقولى له نفسى تعملى مفاجاة..احسن ترجعى البيت تلاقى واحدة معاه ويقولك عملتها لك مفاجاة.!!  ..نصيحة اخيرة..اوعى تساليه عن رايه فى الاكل اللى انتى عملاه؟؟..اصل الرد غالبا مش هيعجبك..طب وليه بقى تغيظى نفسك وتحرقى فى اعصابك..وفى الاخر تكسرى الطبق على دماغه.وتجيبى لنفسك مصيبة!!واتاكدى مدام  اغلب الاسبوع بيوديكوا تتغدوا عند مامته يبقى اكيد بيموت فى اكلك..المعلومة دى ليكى يعنى..والموضوع اصلا تافه يا جماعة..الرجالة اصلا غلابة ومش بيتنرفزوا بسرعة

ارجوك اوعى تغيرررررررررررررررررر

الغيرة دى لو كان ليها لون..يا ترى كان هيبقى لونها ايه؟؟متهيالى احمر او اصفر كده زى النار..او نحطهم على بعض ويبقى لونها اورانج..المهم انها حاجة زى النار كده ومشعللة..وتدخل ع القلب تحرقه على طول!! والغيرة انواع على فكرة..يعنى فيه واحد بيغير من زميله عشان انجح منه وواحد بيغير على مراته وواحدة بتغير على صحبتها يعنى مش عايزااها تكلم حد غيرها..وساعات الام بتغير على ولادها..وساعات ستات بيغيروا على الراجل من شغله او من صحابه!!يعنى عشان نفهم اكتر ..باختصار اى حد بياخد الجو منك بتغير منه..شغل الراجل واخده منك او صحابه او عربيته.او واحدة تانية..والست لما بتغير بتكتم فى قلبها يا عينى وتعيط من سكات..انما الراجل بيزعق ويكسر ولو حاولتى تدافعى عن نفسك شوية يمكن ايده تطول عليكى ..بس تستاهلى حد قالك تطولى لسانك..ده انتى تستاهلى قطعه كمان..وعلى راى لطوفة ارجوك اوعى تغير وانا حواليا كتير!!مش عارفة الصراحة ازاى حواليها كتير ومش عايزاه يغير..ده اسمه استعباط..بس الدور والباقى باقى على اللى مابيغيرش اصلا..انا اعرف واحدة خطيبها مش بيغير عليها خالص!!واثق من نفسه بقى..وفى يوم كده والشمس كانت طالعه وفيه مطر خفيف ..وفى ساعة صفا..موبايلها رن..طبعا هيا اصلا موصيه البت فاتن صحبتها ترن عليها قدامه عشان يخلى عنده شوية دم وكده..لكن الجدع عمال يهزر ويضحك ولا على باله..ايه الروقان ده بس يا راجل..موبايل خطيبتك يرن كده وانت قاعد هادى..طب تصدق المفروض كانت تقولك كلمة وحشه بس هيا بس اللى متربية..ده ما بقاش فيه رجولة يا جدعان!!موبايل خطيبته بيرن قدامه..ده لو حكى كده لامه هتهريه ضرب..المهم الجدع الحليوة خطبها وشه احمر..يعنى ما احمرش اوى..يعنى بقى بمبى كده..وقال بهدوء:(كويس شكله هينطق اخيرا وعقدة لسانه هتتفك)حلوة اوى النغمة بتاعتك دى؟؟ينفع تبعتيها لى يا روحى؟؟..لا يا راجل ..هوا ده كل اللى لفت نظرك..رنة الموبايل..شكلك مش هتعمر معانا..خطيبته الامورة اللى مرارتها هتتفقع قريب:اه ينفع ابعتها..عادى يعنى!بس انت عارف مين اللى كان بيرن عليا..ها عارف(وتغمز عينيها كده عشان تستفزه شوية)بس على مين ده ينرفز بلد..:تلاقيها واحدة من صحابك العبط!!
كتمت غيظها:لاء ده مصطفى جارنا..(عارفه؟)...طبعا الواد عايز يقولها وانا مالى مصطفى ولا فهمى ولا حتى مصطفى فهمى شخصيا..:وانا مالى يا حبيبتى ..هوا موبايلى ولا موبايلك؟؟(ادى اخرة الفرجة ع الافلام الاجنبى)الواد مابقاش عنده نخوة خالص!!
البت على اخرها..ياللا ما بدهاش بقى ..اديله قنبلة...قربت منه وقالت له بصوت واطى كانها هتقوله سر مثلث برمودا:طب انت عارف انه كان عايز يخطبنى!!..وجون وجون وجون...لاء ده باين ما طلعش جون ..طلع تسلل..:معقولة..كان عايز يخطبك..طب ما خطبكيش ليه؟قصدى وبيرن لك ليه؟؟اتجنن ده؟؟ده انا هكسر الدنيا على دماغه!!(كده الراجل عمل اللى عليه وغار عليها اهوا) ياللا ابعتى لى النغمة بقى..!!!الاخت التانية بقى اللى قاعدة مع خطيبها فى المطعم..وخطيبها عينه عليها..خايف احسن تلمح قطة معدية ولا حاجة..(عكس اخينا الاولانى خالص)بس خطيبته بقى عسل كده وروشة وهتروشه معاها
الراجل هيتجنن:انتى بتبصى على مين؟
هى:ببص لك يا قلبى
هوا:لا نن عينيك مش فى نن عينى من جوة..انا متاكد..(الحكاية بقى فيها ان)
هى:هبص لمين بس يا عقلى
هوا: مش عارف..انا هتجنن..
وفجاة ضبطها(ليلتها مش هتعدى )بتعاكس طفل صغير ..
هوا:انتى بتضحكى لمين؟؟
هى:بكلم النونو اللى هناك ده..شايفه يا عمرى؟؟
هوا:وانتى بتعاكسى النونو ليه ..انتى تعرفيه؟؟(الصراحة الراجل معاه حق .يبقى منظره ايه يعنى وسط صحابه الشحطة لما يشوفوا خطيبته بتعاكس نونو..ده كده محدش هيحترمه بعد كده)
هى:لا معرفوش يا حبى..بس شكله كيوت اوى
هوا: انتى متنحة كده ليه؟؟(يا بت اتلمى بقى..الراجل اعصابه باظت)
هى:ايه متنحة دى يا بيبى؟؟ايه الالفاظ دى
هوا:انا مش بيبى..انا راجل وسيد الرجالة..ولا انتى شايفة غير كده..!!
واللهى يا جماعة انا شايفة انه قمعا للمشاكل انهم يحترموا نفسهم وما يروحوش ياكلوا فى مطعم تانى..ويقرفونا احنا بقى..ونفضل نسلك بينهم وبتاع. المهم خطيبها راح لابو النونو الصغنونو وقاله ينفع كده ابنك عمال يعاكس غى خطيبتى من ساعتها!!ابو النونو الصغنونو ضحك وفرد شنبه:طالع لابوه بقى!!(يا فرحتى).وبعدين هيا البنات عايزين ايه؟؟لااللى بيغير عاجب ولا اللى مش بيعبر عاجب..تقريبا كل واحدة تشوف شخصية خطيبها ايه وتتمنى عكسها!!عشان تحس انها مظلومة وكده واتحرمت من فارس احلامها ابو حصان مشمشى..اقولكوا حاجة اخيرة.؟.واحدة صحبتى مرة بتكتب قصة عاطفية..وبتقول لجوزها : اقرا القصة دى يا حبيبى وقولى رايك بصراحة(تستاهل ضرب ال...انها طلبت رايه)
الراجل لسه بيقرا..وشه احمر واصفر واخضر ..بقى فاضل انها تعصر ليمونة ويبقى طبق سلاطة..!!مراته اتخضت:مالك يا جيمى..هيا القصة وحشة للدرجة دى؟؟
هوا:ايه ده؟؟مين عمرو ده؟؟
هى:اهههههههه..قول كده..عمرو ده يا سيدى المفروض انه مهندس وبيعجب بالبطله وبيطاردها طول القصة بس هتحصل مفجاة فى الاخر(ده الامور جوزك اللى هيعملك مفاجاة..ما تستعجليش على رزقك)..هوا:وانتى عرفتيه منين عمرو ده؟
هى:عرفته ازاى يعنى؟؟
هوا:يعنى مين عمرو المهندس ده؟؟عرفتيه منين ..انطقى.
هى:دى قصة يا حبيبى قصة..خيااااااااااااااااااااااال
هوا:انا مالى بالقصة؟؟انا عايز اعرف مين عمرو ده والا ليلتك مش هتعدى على خير..
الراجل اتجنن خالص يا عينى..وهيا كمان غلطانة لازم تكتب البطل اسمه عمرو..ما تكتبه فتحى على اسم عم فتحى البواب عشان الراجل مايشكش فيها..مش تسميه عمرو عل اسم جارهم المهندس الحليوة..ما الراجل برضه كده معذور..وع العموم صحبتى من يوميها وهيا اعتزلت الكتابة نهائيا وما بقتش لا بتقرا ولا بتكتب ومابقاش ليها اى(علاقة)بالورقة والقلم!!

تلاتة فى واحد

انا ممكن اتكلم فى التليفون واطبخ واكل واشيل النونوكمان فى وقت واحد..طب خدوا دى بقى...ممكن اسوق العربية واقرا الجرنان واتكلم فى الموبايل..(طبعا مش بعمل كده  مش عشان الضابط اللى واقف ولا عشان خايفة على نفسى.لكن عشان انا اصلا معنديش عربية!!)...على فكرة اغلب الشعب المصرى كده..وبالذات الستات الغلابة اللى بيعملوا مليون حاجة فى نفس اللحظة..انا اعرف ناس بيشتغلوا وفى نفس الوقت بياكلوا سندوتشات فول وطعمية وفجل وبصل وساعات والله بلاقيهم بياكلوا فسيخ كمان!!مرة رحت مصلحة حكومية ولقيتهم بياكلوا فسيخ ..والريحة بقى ايه ضاربة فى المكان كله...والمدام جت تمضى لى ع الورق  لغاية ما الورق بقى ريحته مسقعة خالص..!!الرجالة بقى ممكن تلاقيهم بيكلموا اتنين فى نفس الوقت.!!فاتح الماسنجر والسكاى بى..
الاول فى الماسنجر:ايوة يا حبيبتى..وحشتينى اوى
المسكينة الاولى: وانت كمان..كنت فين امبارح؟؟
يرد فى السكاى بى:اصلى امبارح كنت تعبان اوى وطول الليل فى البيت نايم
المسكينة التانية:انت نسيت ولا ايه؟؟مش احنا خرجنا سوا امبارح.لحقت تنسى؟؟
يرد فى الماسنجر:والله انا مش فاكر انا كلت ايه النهاردة؟؟ بس على فكرة فستانك الاحمر امبارح كان تحفة عليكى
الاولى :احمر..وامبارح..انت قصدك مين؟؟
هوا:انتى طبعا..فى الحلم..كنتى لابسة احمر فى احمر وكنتى زى القمر
يتكلم فى السكاى بى..تساله المسكينة التانية:ايه اكتر حاجة بتحبها فيا؟
يرد فى الماسنجر:بموت فى عينيكى وشعرك الاسود الطويل
 الاولى :انت هتستعبط؟؟.انا شعرى على طول كاريه قصير..
هوا:لا لا..ما اهوا كان طويل فى الحلم بتاع امبارح.
.وكان لايق اوى عليكى
يرجع للسكاى بى:تساله انت اتغديت ايه؟؟
يرد: سمك
يرجع للماسنجر: كان شكلى ايه فى الحلم ؟
هوا: كان مشوى بس يجنن
هى: ايييييه؟مشوى..!كنت محروقة يعنى
هوا:لاء قصدى السمك..ويسكت شوية..
ويرجع للسكاى بى.تساله:انت بتتاخر ليه عليا فى الرد؟؟
هوا :معلش معايا تليفون
(مش راحم نفسه بيكلم واحدة تالتة كمان)..وبعدين يرجع الماسنجر: هوا انتى انهى واحدة؟؟..انا دخت..!!
طبعا فيه رجالة كتير كده..يكلموا 3 و4 بنات فى نفس الوقت..وفيه ناس بيشتغلوا اربع شغلانات برضه..وفيه ممثل تلاقيه بيمثل وبيؤلف وبيغنى وبيخرج وبينتج..وفى الاخر برضه تلاقيه هوا اللى بيتفرج ع الفيلم لوحده.!!صاحب بالين كداب..وصاحب تلاتة منافق..الحقيقة انا مؤمنة اوى بنظرية التخصص والتركيز فى حاجة واحدة..لان ده بيخلى الواحد يعمل الحاجة دى باتقان..ويبقى فرحان كمان وهوا بيعملها وبيحقق نتايج كبيرة فيها..زمان مثلا كنت تلاقى الفيلم قصة فلان وسيناريو فلان وحوار فلان..قمة التخصص..واهوا برضه عشان السبوبة يسترزقوا كلهم منها..دلوقتى كل واحد عايز ياكل التورتة لوحده..ومع كده تلاقى زمان خالص بقى ..ابن سينا مثلا اشتغل فى الطب والفلسفة!!بس انا شايفة انه نبغ فى الطب اكتر.ابن رشد بقى ده كان حكاية..كان قاضى وطبيب وفقيه وفيلسوف وفلكى وفيزيائى.ورغم كده برضه اشتهر بالفلسفة اكتر حاجة وكان من اشهر فلاسفة الاسلام.. يعنى فى الاخر نجح فى حاجة اكتر من غيرها واشتهر بيها..اصله ما ينفعش ينجح فى كله بنفس النسبة!!عشان كده انا رايى ان احنا المفروض نطبق نظام التخصص فى حياتنا يعنى مثلا  ست البيت تطبخ وجوزها يغسل المواعين وبنتهم تمسح الشقة و ابنهم ينشر الغسيل..وابنهم التانى يوقع الاكل عى السجادة اللى لسه منظفينها ما اهوا كمان متخصص فى كده.وطبعا كل ما تخلف اكتر تستفيد اكتر..لان التخصصات عندك بتزيد..ولازم كل واحد بقى يتقن اللى بيعمله..يشتغل بذمة يعنى..انما الست المسكينة تعمل كل ده لوحدها..ده حتى يبقى حرام.. مش كده ولا ايه يا طنط؟؟اصلى بكلم طنط جارتنا اللى فوق وانا بكتب..بسلى نفسى بس مش اكتر..!!

عشان جوزك يحبك

طبعا فيه اساسيات كده عشان جوزك يحبك..وهيا حاجات تافهة اوى الصراحة..بس لازم كل زوجة تعملها وعقلك فى راسك تعرفى خلاصك..
اول حاجة لازم طبعا تبقى طباخة ماهرة يعنى اى صنف جوزك يفكر  فيه مجرد تفكير او يخطر على باله مجرد خاطر لازم طبعا تجرى تعمليهوله..طبعا مش سبع البرمبة..وهوا احنا عندنا كام سبع البرمبة..وبعدين لازم الراجل كده يبقى ماشى كرشه مترين قدامه ووشه منور كده وكلبوظة..
تانى حاجة تتعلمى انك تكونى متكلمة كده ولذيذة ودمك خفيف ..افرضى مثلا التليفزيون باظ..جوزك هيلاقى مين يسليه..مش احسن ما يشترى بجنيه لب اسمر..
تالت حاجة.(.مهمة اوى تالت حاجة دى)..تتعلمى تكوى الهدوم وتصلحى اللمض..طبعا اومال تضيعى فلوس الراجل يعنى ع المكوجى والكهربائى..وما تقوليش بقى اخاف اتكهرب..ماتبقيش خوافة كده..لو ليكى عمر مش هتموتى ماتخافيش..
رابع حاجة..تبقى دادة ..ماانتى هتخلفى بقى  خمس ست عيال كده وماتقوليش تنظيم اسرة والكلام الفاضى ده..الراجل عايز يبقى عنده عزوة..وبلاش حجج فارغة..اصل جسمى هيبوظ واعصابى هتتعب..ومش هعرف انام من العيال..ياستى عنك مانمتى..المهم الراجل ينام وهوا مبسوط كده ومرتاح نفسيا..اهم حاجة نفسيته..عشان يتفشخر كده وسط صحابه..(انا سامعة واحدة بتقول ما عنه ما حبنى..لاء اوعى تقولى كده..هوا انتى ليكى بركة الا هوا؟)
خامس حاجة..انك تنظفى البيت وتمسحيه كله لوحدك..وماتقوليش هتعب وظهرى وجعنى.. معلش زكاة عن صحتك..ولا اقولك اعتبرى نفسك بتلعبى رياضة..مش احسن ما تتخنى وتبقى كعبورة والراجل يبص لبرة بقى وتيجى تعيطى....سادس حاجة ..انك تكونى اقتصادية كده وموفرة زى اللمض الموفرة كده..يعنى مش لازم تاكلى تلات وجبات فى اليوم..كفاية اوى وجبة..مش انتى يا ختى رايحة جاية طول النهار عند دكتور الرجيم ..اهوا الرجيم جاه لغاية عندك اهوا..ومش لازم تشترى لبس كتير ..كفاية طقم واحد تلبسيه صيف شتا..ما اهو اصلا الصيف بقى زى الشتا دلوقتى وسيبى الراجل بقى يدلع هوا نفسه ويشترى لبس كتير كده وينبسط..سابع حاجة...انك تبقى رومانسية كده وتدلعيه ..اه تحفظى ليك كام اغنية عاطفية كده من بتوع اليسا وتغنيها طول النهار زى الهبلة..كل مايشوف خلقتك يلاقيكى بتغنى ..وماتقوليش بقى صوتى وحش ونشاز.. يعنى هما اللى بيغنوا دلوقتى احسن منك فى ايه؟..اخر حاجةبقى...انك تبقى حلوة كده ومهتمة بنفسك..هيفاء وهبى..عايزة الراجل يرجع البيت يلاقى هيفاء وهبى..بغض النظر عن شكله هوا..المهم انتى تبقى قمر وماتقوليليش ازاى..اتصرفى..اعملى عمليات تجميل..اعملى رجيم..نيولوك..المهم يلاقى هيفاء قدامه حتى لو كان هوا عبد الفتاح القصرى..المهم تعملى انتى اللى عليكى وخلاص..وكل ده عشان سيادته يحبك..بس خدى بالك لما تعملى هيفاء وهبى مش جوزك بس اللى هيحبك..ده الوطن العربى كله هيحبك..وساعتها جوزك هيغير عليكى وهيتعصب ودمه هيفور واحتمال كمان انه يطلقك..وابقى ساعتها  افتكرينى..

راسين فى الحلال

يابخت مين وفق راسين فى الحلال..كنت زمان مقتنعة اوى بالمثل ده..دلوقتى بقى بقيت مقتنعة بمثل تانى خالص..بس بلاش اقوله دلوقتى..خليه للاخر..اخر مرة وفقت راسين فى الحلال كان من حوالى سنة..والراسين دلوقتى تقريبا بيدعوا عليا طول النهار..ناس محترمة اوى الحقيقة..كل ماسيرتى تيجى قدامهم بيلعنوا اليوم اللى شافونى فيه..اصل هيا البنت كانت حلوة وامورة وجبت لها عريس كويس بس هوا ممل شوية..كل شوية يسال اسئلة
هوا:طب هيا حلوة يعنى؟
انا:دى زى القمر..مش شبهك خالص
هوا:طب شبه مين يعنى؟؟
انا:ممممممم شبه هالة فؤاد كده
هوا:الله يرحمها كانت فنانة محترمة والله.
انا:اه والله
هوا:طب هيا بشعرها ولا محجبة؟
انا:محجبة
هوا:طب انا مش عارف هالة فؤاد شكلها ايه بالحجاب؟
انا: اللهم طولك ياروح..ياسيدى روح شوفها واحكم بنفسك
المهم بعد شوية..يسالنى:هيا اتخطبت قبل كده؟
انا:لا
هوا: اصل بصى هوا مفيهاش حاجة..بس المهم ماتكدبش عليا..مش تيقى اتخطبت قبل كده وماتقولش واتفاجىء انا بعد كده.لا ء كده بتقفل بقى
انا:لا ماتقلقش انا متاكدة انها مااتخطبتش قبل كده
هوا:طب ماتقوليلى لو اتخطبت قبل كده مفيهاش حاجة
انا:يالهوى..ياابنى ماتخطبتش..انت عايز تتخانق؟(ياسيدى افصل ده حتى الموبايل بيفصل شحن وانت لاء)
وبعد حوالى ربع ساعة..طب هيا خريجة ايه؟
انا:مش فاكرة..بس هيا خريجة حاجة كويسة خالص والله
هوا:عندها كام سنة؟
انا:هوا سنها يتراوح بين 24 و26 سنة تقريبا
هوا:هوا اسمها ايه؟
انا:سماح
هوا:بس انا اختى اسمها سماح وانا اسمى سامح..كنت عايز اغير بس ياللا مفيش مشكلة..انتى عارفة اصل انا ماليش اصلا طلبات كتير..انا عايز بس بنت حلوة وبيضة ورفيعة وطويلةومحترمة وبنت ناس ودكتورة وفى نفس الوقت ست بيت شاطرة ومدبرةومهتمة بنفسهاودمها خفيف ولذيذة وطيبة....حاجات بسيطة خالص
انا:اه فعلا حاجات بسيطة..ده انت غلبان ياراجل
المهم الراسين اتقابلوا ..وتقريبا ضربوا بعض والبت جاتلى وشها متشوه وجاتلها عقدة م الجواز..والواد جاله انهيار عصبى وقلب بتخلف عقلى بعد كده وبقى يمشى يقول:انا جدع انا جدع..انا الواد الجن..,ومن يوميها ومواصفات شريكة حياته اتغيرت خالص وبقى اهمها انها تكون عروسة طيبة ومسالمة ومش بتعض!!! ههههه الصراحة فرحانة فيه اصله زهقنى..ع العموم........انا مرة اختى رفضت عريس عشان ما عرفش يفتح ازازة العصير!! ومرة رفضت عريس تانى عشان كان بياكل الجاتوه بايده..ماسكه بايده كده وملغوص نفسه..ومش كده وبس ده كمان بعد كده قعد يمصمص فى ايده..حاجة يع خالص على راى بنتى الصغيرة.....بس هما البنات كده يفضلوا يعيبوا ع العرسان لحد ما يندموا..والعريس لما بيتقدم لشابة فى العشرين بتسال:كيف هو؟؟ولما بتكون فى التلاتين بتسال:من هو؟؟و بعد كده بقى بتصرخ:اين هو؟؟موضوع الجواز ده قسمة ونصيب بجد..تعرفوا كان فيه واحد رايح يشوف عروسة ..هيا كانت بتشتغل فى صيدلية..ويوم ما راح سبحان الله هيا غابت عشان كانت تعبانة وهوا راح و شاف صحبتها وكان فاكرها هيا العروسة بس عجبته اوى واتخطبوا  واتجوزوا وقربوا يجيبوا عتريس صغير...
واحد تانى كان معدى على صحبه ياخده معاه عشان رايحين يشوفوا عروسة..وهوا بقى معدى عليه شاف جارة صحبه وعجبته وما راحش مشوار العروسة..نصيب سبحان الله..ويمكن لو جارة صحبه دى كانت عارفة ان فيه حد هيشوفها وعملت حسابها مكانتش عجبته..لكن عشان كانت بطبيعتها ومش واخدة خوانة عجبته..يعنى م الاخر لو كل واحدة تخليها على طبيعتها وماتبذلش جهد وماتتكلفش وتسيب نفسها..هتلاقى نصيبها جالها لحد عندها..اما انا بقى عن نفسى مش همشى فى جوازة تانى..ومش هوفق لا راسين ولا تلاتة..ولا حتى راس كرنبة...امشى فى جنازة ولا تمشى فى جوازة
...؟

وهدخل الموسوعة

انا نفسى ادخل موسوعة جينيس للارقام القياسية..يعنى نفسى اعمل حاجة غريبة عشان ادخل الموسوعة دى..طب استنوا عليا كده لما افكر ايه اكتر حاجة انا بعملها ومحققة فيها رقم قياسى؟؟يا ترى ايه؟ لما اجيب ورقة وقلم كده واكتب:
1-اكتر واحدة بتجيب فى سيرة الناس.. (لا لا طبعا مش للدرجة دى العشرين ست اللى بجيب فى سيرتهم دول مش عدد يعنى)
2-اكتر واحدة بتغلس على جوزها..( لا والله ده فيه ستات اغلس منى بكتير ويعنى مش الالفين مرة اللى غلست عليه فيهم يبقى اعتبر نفسى غلسة يعنى)
3-اكتر واحدة بتحب قعدة البيت فى الكورة الارضية..(اه ممكن اقعد 4شهور من غير ما ازهق عادى..مش حاجة مبهرة)
4-اكتر واحدة بتزعق لعيالها..(لا  بجد بقى مش اوى كده..انا مش امنا الغولة يعنى..بالعكس الاطفال كلهم بيعشقونى)
5-اكتر واحدة بترغى فى التليفون..(دى محدش يقدر ينافسنى فيها..بس يا خوفى بعد كده جوزى يقطع الخط عنى ..اصله ياعينى هوا اللى هيتدبس فى الفواتير)
6-ايوة لاقيتها اكتر واحدة بتاكل شكولاتة( بس ده عشان يوافقوا مش هاكل اقل من مليون قطعة يعنى لازم ازيد 100 كيلو ع الاقل..ويا خوفى احسن يحصلى زى روبرت هيرشى اللى غرق فى قدر مليان شكولاتة ومات..مات سايح فى الشكولاتة....هوا صحيح دخل الموسوعة ...بس مش فى قسم اكل الشكولاتة  لكن فى قسم اغرب موتة...ربنا يسترعليا) طب وبعدين ما انا لازم ادخل الموسوعة...هيا طلبت معايا بقى..ومش معقولة يبقى فيه نملة دخلت الموسوعة وانا لاء..ده حتى يبقى عيب فى حقى...وشكلى يبقى وحش قدام النمل..
طب خلينا فى الحاجات الايجابية شوية..اكيد فيه حاجات ايجابية..اصبروا بس لما احاول افتكر..اهاه..اه
1-اكتر واحدة بتحب عيالها ..(وفيها ايه ما كل الناس بتحب عيالها ولا انا هعمل فيها امينة رزق)
2-اكتر واحدة بتحب بلدها..(يا سلام ع الوطنية...هوا عشان ساكنة فى محطة مصطفى كامل ابقى وطنية.؟؟.طب هوا علم مصر لونه ايه؟؟ ناقص اقول انى انا اللى بنيت الهرم)
3- اكتر واحدة بتحب الفساتين الجينز..(اه والله بعشقهم بس دى موسوعة جينيس مش جينز..! وبعدين كده يبقى عادل امام احق منى بالجايزة ده اكتر واحد لبس جينز!)
4- اكتر واحدة بتشترى كتب..(ده انا مخلصة كل فلوسى ع الكتب يا جماعة..المفروض يكرمونى بقى...بلاش مبالغة اكونش انانجيب محفوظ ولا العقاد وانا مش عارفة)
يوووووووووه..انا احترت بقى..كل دى حاجات عادية ومنتشرة..يا ترى ايه اللى اقدر اعمله تانى..ايه اللى عندى وموش عند اى حد..ايه يا ترى؟؟اه عرفت ..عرفت بجد المرة دى..اكتر واحدة بتحب الناس وبتفرح لهم..واللهى مش كلام..بس بجد لما بلاقى حد عنده مشكلة او مهموم بزعل اوى من قلبى.. ودموعى بتغلبنى وبتمنى الخير لكل الناس ..ويمكن بدعى للناس قبل ما بدعى لنفسى..وقلبى طيب اوى والله..ها ينفع اقدم فى الموسوعة...

2كيلو سعادة

انا نفسى ابقى سعيدة اوى..انا ما انكرش انى الحمد لله سعيدة جدا بس نفسى ابقى سعيدة اكتر..ودى تقريبا امنية الناس كلها..وطول الوقت تلاقيهم بيدوروا عليها وكل حاجة بيعملوها فى حياتهم هدفها انهم يكون سعدا..فيه فيلم بحبه اوى اسمه السعادة لويل سميث وهوا طول الفيلم مش سعيد خالص وفاشل ومديون ومراته كمان سابته وابنه الصغير معاه مش لايقين لا اكل ولاشرب ولا مكان يعيشوا فيه..لغاية ما فى الاخر ربنا كرمه واشتغل فى السمسرة ونجح وساعتها عرف معنى السعادة..يعنى  السعادة عنده كانت مرادف للنجاح..اصل انت لما هتنجح فى شغلك هتنجح فى كل حاجة بقى..لانك هتبقى غنى ومعاك فلوس والبنات هتحبك وكده..وبالتالى هتبقى سعيد!!.وفيه حكيم بيقول:.السعادة تختلف باختلاف الاعمار..ففى العشرينات هى الحب وفى الاربعينات الطموح وفى الستينات المجد وبعد ذلك الراحة.والحياة منتظمة جدا لدرجة انك لا تجد شخص يسعى دايما وراء نوع واحد من السعادة...وفيه حكيم تانى بيقول لو السعادة تتاكل  حطها فى طبق.!!اكيد ده مش حكيم ده شكله بتاع فول وطعمية!!!طب فعلا تخيلوا لو السعادة بتتباع فعلا...تروح للبقال وتقوله عايز2 كيلوسعادة مشكلة كده يعنى نجاح على خطوبة على اطفال على تحقيق ذات على حب..ما اهوا كل ده بيحقق السعادة..وتلاقيه يقول للبياع: وهات لى اسبراى حب وغرام عشان ارشه فى الجو..وطبعا هوا هيرش الازازة كلها فى وش حماته عشان يدوخها ويغمى عليها ويرتاح منها....ويشترى بالمرة لفة كلام حلو يقولها لمراته بدل ما اهوا مكتوم كده....وما ينساش يشترى علبة طولة بال وصبر عشان يصبر ع الامامير الصغيرين اللى فى البيت..والناس بقى تعمل مظاهرات وتطالب بخفض سعر السعادة اللى وصل ل60 جنيه الكيلو..ويبقى فيه وزير للسعادة ويكون وزير امور كده ومقطقط واهم حاجة ان سعادته يكون  سعيد  كده على طول.ومفرفش .ويقول فى نكت طول  النهار بدل التصريحات والقرارات الخايبة..وتيجى تشغل الراديو تسمع سعاد حسنى او سميرة سعيد او سعد الصغير..سعادة فى سعادة بقى..ونغنى طول اليوم السعادة بقى لونها بمبى..والسينما تنزل افلام سعيدة فى الطريق العام,وسعيدة ع الحب وخلى بالك من سوسو...والراجل يشترى لمراته سعادة بدل ما يدخل بايده فاضية...تخيلوا بقى الراجل داخل بيته وواثق من نفسه وشايل يجى اربع اكياس معاه..ومراته فرحانة بيه..الراجل بيودع ولا ايه ..دى اول مرة يعملها ويدخل علينا محمل كده..وتجرى  عليه: ايه يا سى صلاح  الحاجات دى كلها
يرد عليها سى صلاح:دى حاجات بسيطة والله يا حاجة..انا اصلى اتكسفت من نفسى اصلى بقى لى كتير ما دخلتش عليكى بحاجة تفرحك
قالت له:ربنا ما يحرمنيش منك ابدا..قولى بقى ايه اللى ف الاكياس ده يا خويا..هموت واعرف
يرد وهوا فرحان بنفسه اوى:دول فضلة خيرك 2 كيلو سعادة على 3 كيلو حب على علبتين كلام حلو على ازازتين غيرة  بس فريش لسه طازة..ودستة مشاعروعواطف جياشة لسه طالعة م الفرن...طبعا الحاجة مسعدة مش فاهمة حاجة لسه:يعنى يا سى صلاح الازازتين دول ارشهم ع الفول ولا ايه؟؟والسعادة دى بقى هتكفينا مش كنت تجيب 2 كيلو كمان..ده انت صحيح راجل جلدة..
سى صلاح:جلدة ايه يا ولية ..دى حاجات معنوية..ولا هيا طفاسة وخلاص
الحاجة مسعدة: لا يا خويا انا مش طفسة وع العموم انا مش عايزة منك حاجة  هوا انا يا خويا ناقصة سعادة ده انا اسمى مسعدة سعيد ابو السعد..روح يا خويا هات لنا كيلو جوافة افيد حتى نعملها عصير والعيال يشربوا وينبسطوا
ومن يوميها وسى صلاح اقتنع ان مفهوم السعادة عند الحاجة مسعدة يتلخص فى اتنين كيلو جوافة ...و3كوز درة..وكيس فيشار الحجم العائلى..

خليك silent

مش قادرة انسى منظر علاء ولى الدين لما كان اللمبى بيعلمه اصول اللغة!!ويقوله تعملهم لى نيللى نيللى هعملهم لك شيريهان شريهان!!وطبعا هوا ساله ببراءة:ودى اقولها فى رمضان؟..قاله  دى تقولها ل اللى بيكلمك بالالغاز!!طب وهوا فيه الغاز اكتر من كده يا جماعة؟؟ ده الكلام ده عايز قاموس لوحده!!طب تصدقوا بايه انا اللى كان يقولى كلمة روشة طحن دى كنت اقفل منه..اصل كلمة طحن دى رذلة اوى..بس طبعا كل واحد وله طريقته واللاذمة بتاعته ..تلاقى ناس كل كلمتين يقولوا يا ربناااا.وناس تقول اخلع .وناس تقولك وهيا بتشرح لك حاجة مثلا (فاهم انت ازاى)..وناس لما تعجب بحاجة تقول(يا جماله يا جماله)وناس عشان تشتم فى حاجة (تقول بيئة) تخيلوا ان البيئة بقت شتيمة..ممكن كمان كام سنة تلاقوا واحدة بتشتم صحبتها وتقولها:انتى بقيتى شمس خالص
والتانية طبعا لازم ترد:انتى اللى طلعتى صلصة وانا كنت فاكراكى كاتشاب..يعنى كل الكلام هيبقى م العينة دى..سمعت واحدة بتقول لصحبتها فى الشغل:خليكى silent يعنى اسكتى و اختفى شوية لغاية ما المشاكل تخلص.وخدوا عندكم كلمة روش وطحن وفكك منى ونفض وخنيق وظرفنى وقشطة تتقال ع الحاجة الحلوة و وميكى ميكى يعنى شاب مالوش لازمة ومصلحة يعنى فلوس وبنت مضروبة بالنار يعنى وحشة اوى.... المهم اخويا مرة كان جاى جعان اوى قعد يزعق:عايز املأ التنك..وطبعا ما فهمناش حاجة وماما ادته ازازتين مية افتكرت عربيته بايظة .اكتشفنا بعد كده ان عايز املأ التنك يعنى انا جعان و معدتى فاضية..وطبعا ماما عملت له الاكل بسرعة وسالته :ايه رايك يا حبيبى رد بسرعة:شغال..على فكرة بتغيظنى اوى كلمة شغال دى..المهم اخويا بعد ما خلص اكل جاه يدردش معايا شوية واول كلمة قالها لى: ايه الحياة؟؟ وده سؤال معناه ايه الاخبار النهاردة وايه الجديد..انا بقى بقيت اروش منه وقلت له:انزل من ع المسرح يا نجم يعنى(ما تتدخلش فى اللى مالكش فيه)..رد عليا:طب انا هدعك الفانوس دلوقتى بقى وهختفى..قلت له يكون احسن انا مستكانيسة كده..يا سلام ع اللغة العربية اللى الشباب ضيعها..بجد حرام..ده انا لما بشوف افلام الابيض والاسود القديمة بتحسر.. بلاقى البطل بيقول لحبيبته: شغلتوا فكرنا ونينة قلقانة عليكوا.!!واظن ان الوقت اتاخر!! واللهى انا لا اظن!!..ناس محترمة اوى..ياللا ع العموم انا ( هخلع دلوقتى )عشان ورايا شغل (استمورننج.). انتوا بقى اتزرعوا هنا احسن الابلتين لدع فى دهاليز الحياة...

كلام وبس

اكتر حاجة بكرهها اللى يقول حاجة ويعمل حاجة تانية خالص..يعنى ألاقى اللى قدامى قاعد تاعب نفسه وعمال يقنعنى بفكرة معينة ولما اركز شوية ألاقى حضرته بيعمل نفس الحكاية بالضبط ..اخويا مثلا فضل يوم كامل يقنعنى بأهمية ان الواحد يصحى بدرى وينام بدرى وقالى سيدنا محمد عليه الصلاة والسلام كان بيصلى الفجر ويفضل صاحى يعنى يومه بيبدأ مع الفجر ..وبعد كده ممكن ينام مثلا بعد الظهر شوية..وقالى سبحان الله الاجانب هما اللى بيعملوا كده مش احنا..تخيلى احنا مسلمين ومش بنعمل كده وبنصحى من النوم متاخر وما بنصليش الفجر..والصراحة انا اقتنعت بكلامه وانكسفت من نفسى وصحيت الفجر أصلى وقررت افضل صاحية..لازم طبعا افضل صاحية ونشيطة وأبدأ يومى بنشاط ودخلت لاخويا اودته لاقيته برضه صاحى وبيصلى ما شاء الله عليه..قلت له بابتسامة مشرقة:صباح الخير
قالى:قصدك تصبح على خير..ده انا لسه ما نمتش..
قلت له:نعم
قالى:اه .هنام بقى واخد اجازة م الشغل النهاردة.ما تصحونيش ع الغدا..سيبونى لما اصحى لوحدى..وحاولت طبعا اقنعه بالكلام اللى قالهولى امبارح عن اهمية الصحيان بدرى وكده..لكن الحقيقة ما لحقتش لانه كان نام فعلا وبياكل رز مع الملايكة كمان..ومش اخويا بس ده انتى تتفرجى ع التليفزيون تبصى تلاقى الواحد من دول عمال يديك فى حكم ومواعظ ويتكلم عن نفسه بفخر اوى وبعد كام يوم تلاقى صورته منورة فى اخبار الحوادث .فلان قتل فلاانة. او فلان طلع بيتاجر فى المخدرات.ازاى ده من كام يوم بيقنع الشباب بالالتزام والادب وألاقى الفنانة الامورة اتحجبت وحفظت كلمتين جاية تقولهم..وبعد كام شهر تيجى فاردة شعرها وعاملاه اصفر كمان وتقول يا جماعة دى حرية شخصية..وتلاقيها بعد ما كانت بتعمل دور أم لسبع عيال بقت بتعمل دور فتاة ليل....اعرف واحد كان زميلنا فى الكلية وكان لما يسمعنا نتكلم عن الابراج يتعصب ويدينا محاضرة فى الاخلاق ..كده حرام..ابراج ايه؟ ايه الجهل ده..وبعد شوية يجى يسالنا: عايز اعرف بس ايه اخبار الحمل مع الجوزاء؟؟يعنى بيتوافقوا ولا لاء؟؟ أسمع كلامك اصدقك ..اشوف امورك استعجب..اعرف واحدة مابتحبش تطبخ ملوخية يوم الجمعة..وكانت قاعدة عندى ونسيت وطبخت ملوخية يوم الجمعة..ولما افتكرت زعلت اوى وخافت..جوزى قالها: ايه المشكلة يعنى.؟؟ قالت له:اصل انا بتشائم بس ..قالها: ايه الجهل والتخاريف دى!! قالت له: اصل عملتها لابويا يوم الجمعة ومات على طول!!قالها وهوا مرعوب: طب ليه كده بس ليه تعملها يوم الجمعة حرام عليكى يا شيخة احنا نقصينك!!..انا بقى بترعب م القطط بس لما بخرج مع بنتى بفضل اضحك للقطط والاعبها من بعيد طبعا عشان مااجبش عقدة للبت الصغيرة  واشاور لها لغاية ماجت القطة نطت فوق منى وطبعا بنتى بتضحك وفرحانة.. لكن انا تقريبا اغمى عليا وكنت حاسة انى هيجيلى شلل اطفال..ولما فقت قلت لبنتى (اصل قلبى ما استحملش المفاجاة).بس انا معذورة برضه يعنى اجيب لبنتى عقدة يعنى.ومع ذلك..انا خلاص خدت قرار..مش هسمع كلام اى حد..وموش هصدق اى حد..وهستخدم عينى وعقلى عشان افهم بيهم الناس واصدقهم مش ودانى

هموت م الضحك

انا النهاردة صحيت من النوم وقررت اعامل كل الناس اللى بيدايقونى وبيعاملونى وحش بنفس طريقتهم..وبدات ببنتى الصغيرة.. قامت من النوم مبوزة ومكشرة وبتصرخ:عايزة اخرج باى ..عايزة اخرج باى
قمت انا كمان مصرخة زيها بالضبط: انا مش عايزة اخرج باااااااااااى
طبعا البت اتسرعت و فضلت ساكتة طول اليوم..ودخلت المطبخ لاقيت الشغالة هيا كمان ضاربة بوزها شبرين قدامها..يا ساتر يارب ع الصبح كده.قلت لها:صباح الخير..ما رديتش عليا وفضلت تبرطم..طيب انا هوريكى بقى الوش التانى.بعد حوالى دقيقة جات تسالنى عن حاجة..ما رديتش عليها.وادتها بوز شبرين زى بوزها بالضبط .وادتها نظرة كده من بتوع زكى رستم وسبتها ومشيت..دخلت اشوف جوزى لو محتاج حاجة اعملها له..احضر له الفطار او احضر له الحمام لاقيته هوا كمان بوزه اربعة شبر قدامه..فيه ايه يا جماعة؟؟هوا ده الشعار القومى للى يقوم م النوم ولا ايه؟؟ولا هما بقى مستهزئين بيا وبيعاملونى كده..ماشى..انا هوريكواوفضلت انا كمان مبوزة حوالى تلات ساعات..لغاية ما بقى وجعنى الصراحة.وحسيت انى ادايقت بجد..هما بيعرفوا يعملوا كده ازاى؟؟فعلا مجهود فظيع..افضل مبوزة ومكشرة وبتكلم ببواخة مع كل اللى حواليا.واللهى حاجة متعبة.ده انا لما ابتسم او اضحك اسهل بكتير..هوا فيه اسهل من الضحك؟؟فيه اسهل من الابتسامة؟؟.فيه احلى من الكلام الطيب الحلو؟؟.لا يا جماعة انا غيرت رايى.ومش هتغير.مش هعامل الناس زى ما بيعاملونى .اناهتعامل بطبيعنى انا وبطريقتى انا.واللى عاجبه عاجبه بقى..ورحت لبنتى الصغيرة وضحكت فى وشها ولعبت معاها وهيا فرحانة بيا اوى وما قالتش انا عايزة اخرج باى تانى الحمد لله نسيت خالص..ودخلت المطبخ وقلت للشغالة بابتسامة عريضة: ايه الروايح الحلوة دى؟انتى طابخة ايه؟؟ وسبحان الله لاقيتها بتضحك لاول مرة فى التاريخ وبتقولى:ربنا يجبر بخاطرك ويخليكى لينا..يا سلام ع الكلام الحلو..ودخلت على جوزى وانا هموت من الضحك وسالته:عايز حاجة يا حبيبى؟؟رد بابتسامة جميلة: ما ستغناش عنك يا حبيبتى..الله الله..والله انا هعيط من كتر الرومانسية والفرفشة اللى انتشرت فى البيت..بنتى بقت طول النهار تتفرج على القنوات الكوميدية والشغالة بقت طول النهار تضحك عمال على بطال زى الهبلة..وجوزى محسسنى انه هيعمل قريب اعلان عن معجون سنان او حاجة.!!.شفتوا بقى الابتسامة بتعمل ايه..اوعوا تكشروا تانى

انا والشغالة

والله دلوقتى الشغالة بقت مشكلة ..بصراحة بيصعبوا عليا ولو ان اغلبهم عايزين الضرب..يعنى واحدة مثلا تلاقيها ضاربة لك بوزها شبرين وكل ما تكلمها او تطلب منها مثلا طلب برىء ولو انه مش من حقك تطلب لان الست الهانم مشغولة بمتابعة حلقة مهمة من المسلسل العربى اللى بتحبه..وتحاول تقترب منها على استحياء وتطلب وانت فى قمة الادب والذوق وبتبص لتحت مكسوف وفى قمة الخجل وصوتك يا عينى مش طالع: لو سمحتى ممكن كوباية شاى؟ لو مكانش عند حضرتك مانع يعنى؟ ..تقوم الهانم قالبة وشها ونافخة شهيق وزفير فى وشك تحس كانك هتطير من كتر النفخ وتقولك ببرود:شاى تانى ..ده انت حالة صعبة..حاجة تقرف .ده انتوا هتنقطونى..تقوم انت متراجع بادب: والله ما انتى قايمة.اتفرجى ع المسلسل براحتك ولو عايزانى كمان اعملك شاى معايا لو تحبى..
طبعا دى عينة من النوعية الرذلة منهم..وفيه نوعية تانية اصعب..وهى النوعية السهتانة .اللى بتدخل على راجل البيت على طول وتوجه له الكلام وكانها لا ترى زوجته كانها هوا مثلا..وتقترب منه فى حنان:عايز حاجة يا بيه؟انا عاملة لك عصير مانجة تحفة..الراجل يا عينى يتكسف من مراته اللى قاعدة جمبه تزغر له وعينه على عصير المانجة وبعد تفكير طويل وصراع مع النفس وكده يقرر انه ياخد منها العصير لكن يديه لمراته حبيبته فى حين ان الشغالة واقفة متغاظة وهتطق من الغيظ...وفيه نوع بقى بارد ورايق وممل يعنى الواحدة منهم تفضلى واقفة جمبها تشرحى لها ازاى تنظف وازاى تمسح يعنى لو انتى اللى مسحتى بنفسك كان هيبقى اسهل واسرع...فيه نوع منهم عسل اوى بقى بيحب المشاركة..نوع اشتراكى كده بس لذيذ.تلاقى المدموازيل منهم ما تحبش تعمل شغل البيت كله لوحدها ودى تيجى ازاى..لازم الكل يتعاون..تلاقيها عاملة اودة واحدة او اودتين..وتقول لست البيت: انا عملت لك اودتين كفاية عليكى كده.اتنشطى بقى انتى شوية واعملى الريسيبشن والحمام والمطبخ..مفيهومش حاجة..هوا ايه انا هقطع نفسى.هوا انا ماكنة..وتلاقيها تشغل العيال الصغيرة اللى فى البيت.مرة ضبطتها كل شوية بتبعت بنتى تجيب لها حاجات.شوية تقول لها:قومى يا بت هاتى المشطة بتاعتى
وشوية روحى هاتى لى كوباية مرة..
انا بقى لما ضبطتها كنت هتجنن قلت لها:فيه ايه..انتى هتشغلى البت الصغيرة؟قومى هاتى لنفسك..
ردت بمنتهى البرود:المفروض تعوديها من صغرها انها تساعدك عشان ما تبقاش بروتة
قلت لها: والله مش هيا اللى بروتة بصراحة
المهم فضلت تقنع فيا واقنع فيها وتحمسنى وتحكى لى فى قصص لغاية ما بقيت انا شخصيا مقتنعة جدا بمبدا المشاركة والاشتراكية وكل حاجة فيها حرف الشين واتحمست اوى للشغل الصراحة..وبقيت لهلوبة واشطر منها كمان..عن اذنكم بقى عشان الحق احضر لها الحمام بنفسى عشان سيادتها عايزة تاخد دش

طفلة لمدة ساعة

واللهى الاطفال دول احلى حاجة فى الدنيا-رايقين كده ومش على بالهم اى حاجة وبيتصرفوا بطبيعتهم يعنى مش مضطرين ينافقوا ولا يجاملوا -ولما يصروا على حاجة يفضلوا يزنوا عليها ومتمسكين بيها للاخر-انا نفسى ارجع طفلة تانى ياريت كان ينفع وف لحظة التمنى دى اقتربت منى صديقتى وقدمت لى قطعة من الكيكة الى عاملاها بايديها وانا طبعا بدوق اول قطمة ما قدرتش-بجد وحشة بجد ملهاش حل وفضلت اغصب على نفسى واضحك فى وشها واقول والابتسامة مالية وشى روعة تحفة ما دوقتش كيكة فى حياتى بالطعامة دى -طبعا صحبتى كل شوية تدينى حتة زيادة ودى اخرة النفاق-الله يرحمك يا معدتى-وانا مضطرة اكل وبعدين صحبتى صدقت نفسها وقربت من بنتى وقالت لها بحب :اتفضلى يا حبيبتىطبعا بنتى الجميلة ابتسمت فى الاول وبعد كده وبعد اول قطمة قالت بكل براءة وصراحةانا شخصيا بحسدها عليها:يع ايه القرف ده ..انا من جوايا الصراحة فرحت قلت يمكن صحبتى تخلى عندها دم وتبطل الحاح عليا لان بطنى خلاص وجعتنى وقعدت طبعا اقول دى ما بتفهمش حاجة دى كيكة تحفةقامت صحبتى اللذيذة قالت لى:خلاص يا حبيبتى بالهنا والشفا خدى كلى الطبق بتاع زوزو بنتك مدام عجباكى اوى كده ساعتها بقى ما قدرتش امسك نفسى وصرخت فيها وقلت لها حرام عليكى دى الكيكة يع خالص وملهاش طعم وانفجرت فى البكاء والصراخ كالاطفال حتى بنتى الصغيرة كانت بتحاول تهدينى:خلاص يا مامى هاكل طبقك ما تزعليش لكن انا خلاص عشت فى دور الطفلة وطلعت اجرى وهما يجروا ورايا لغاية ما دوغتهم السبع دوخات بس الصراحة انبسطت اوى انى واجهت صحبتى بالحقيقة مع انها برضه ما سابتنيش اروح قبل ما اخلص صينية الكيكة كلها

مش هشجع تانى

بعد الاحداث الاخيرة دى بتاعة الجزائر ومصر ماحصلت-صابتنى سدة نفس وكسرة وحزن دفين واحباط-وبقيت كل ما اشوف حاجة مدورة اعيط-يعنى اشوف برتقانة او اشوف رمانة او بسكوتة مدورة افتكر الخيبة والكورة وازعل اوى-بجد كرهت اى شكل دائرى لانه بقى بيمثل لى ذكرى سيئة وبيفكرنى بحاجات وحشه-وبقيت كل ما اسمع اغنية وطنية متصورة على الكورة اتدايق واقلب على طول-ولقيتهم بعد كده بيستعدوا لكاس الامم الافريقية-قلت يوووه مش هشجع ولا هتابع ولا هتشد ولا هتفرج ولا ههتم-ويوم ماتش مصر ونيجيريا اصريت انى ما اتفرجش ونمت مخصوص قبل الماتش بربع ساعة عشان ما اتابعش حاجة-وكل ما احاول ادخل فى النوم اقوم مفزوعة لانى شفت الكورة وقعت م البلكونة واتخرمت واقول اعوذ بالله من الشيطان الرجيم ايه الكابوس ده-واحاول انام تانى احلم بعلم مصر حد بيشده وعايز يحرقه وانا اصرخ فى الحلم-واقوم مفزوعة تانى يووه مش هعرف انام-وقلت اشغل التليفزيون لكن على اى مسلسل وخلاص مدام فشلت فى انى انام-بس مش قادرة اتابع المسلسل مش لانه رخم ولا حاجة ولا لانى شفته قبل كده مليون مرة لكن عشان ايدى بتاكلنى وعايزة اجيب قناة الماتش وفعلا جبتها بعد صراع طويل مع النفس وفوجئت لانى لقيت مصر مهزومة واحد صفر-يووووووووو استغفر الله العظيم ليه كده-خلاص انا هطفى التليفزيون ومش هتفرج على حاجة وقفلته وحاولت انام وبعدين قلت اكلم اختى ادردش معاها واضيع وقت-وقلت لها شفتى احنا من اول ربع ساعة جاه فينا جون شفتى-قالت لى لا يا بت احنا متعادلين دلوقتى واحد واحد-قلت لها يا شيخة وقفلت السكة تقريبا فى وشها وشغلت التليفزيون وعندى شوية امل تانى-وبعدين الشوط خلص-وقلت مش هتابع الشوط التانى بلا وجع دماغ بقى0ودخلت المطبخ قلت اطبخ او اعمل حلويات اضيع وقت وفجاة سمعت صرخة فى الشارع-ايه ده معقولة دخلنا جون-اروح اشوف التليفزيون ولا بلاش بلا وجع قلب-وقعدت اخترع واعمل فطيرة تفاح عجيبة ملهاش طعم ولا ريحة-المهم سبتها تتحرق ومقدرتش امسك نفسى ورحت اتابع بقية الماتش ولقيت مصر جابت جون كمان وشوية وجابت التالت-يا كريم يارب ايوة كده برافو عليكوا -هوا ده اللعب-الحمد لله الواحد فرحان والله-بس مش عارفة انا شامة ريحة غريبة-اه فطيرة التفاح اتحرقت باين-مش مهم-المهم مصر كسبت-عقبال باقى الماتشات-وللاسف الواحد اتشد تانى وهيتابع تانى واتكتشفت انى مصرية بجد وغصب عنى لازم اتابع بلدى ولازم اتعصب واشجع وادعى لهم