بخاف

اوحش حاجة فى الدنيا هيا الخوف.لانه بيخلينا مش عارفين نستمتع بحياتنا.بنخاف من كل حاجة.من المرض وبنفضل طول الوقت قلقانين على نفسنا ولما نحس باى وجع نخاف.وبنخاف من الموت ولما بنسمع ان حد مات نخاف ونترعب اننا نسيب اقرب الناس لينا.وبنخاف خوف عام من المستقبل لاننا منعرفش فيه ايه؟واى شىء مجهول بنخاف منه.وبنخاف من الفشل.ومن الفقر.ومن الحسد .وبنخاف من الخيانة.واننا نلاقى اقرب ما لينا بيخونونا واحنا ما نعرفش.وفيه اللى بيخاف من الحيوانات وفيه بيخاف من الادوار العليا وفيه بيخافوا اوى من الظلمة.وفيه كمان ناس بتخاف من الجواز وبتتهرب منه وفيه بيخافوا من الولادة.وساعات الخوف نفسه بيبقى اصعب من الشىء نفسه.وافضل اتخيل فى حاجات وحالات شاذة زى ان الدكتور ينسى مقص مثلا جوايا .كل الحاجات الغريبة تفكر فيها .مع ان الحاجة دى نفسها تافهة جدا وبتعدى.انا اعرف ناس بتخاف اوى من الدكاترة ومن ريحة العيادات والمستشفيات.ربنا يبعدنا عنهم.عارفين بقى انا بخاف من ايه؟؟ من القطط وما تضحكوش.على فكرة نابليون بونابرت قائد الحملة الفرنسية بجلالة قدره كان بيترعب من القطط.انتوا بتخافوا من ايه؟؟

من خرج من داره

انا شخصية بيتوتية .يعنى بحب البيت اوى .اوى.وبحب اخرج برضه بس مش كتير.وما احبش مثلا اخرج يومين ورا بعض.بحس ان البيت فيه دف كده وحنان لكن الخروج بقى متعب لسه هتطلعى لبس من الدولاب وهتكويه وبعدين تلبسه وتحطى الطرحة وتضبطيها وبعدين تلمعى الشوز.وتنزلى السلالم وتمشى شوية لغاية ما توصلى للعربية.ومع ان جوزك هوا اللى هيسوق بس بحس بارهاق اكتر منه.المهم يركن العربية وتطلع عينه.المهم هتشيلى بنتك بعد ما تكونى غيرت لها البامبرز ولبستيها وسرحتى لها شعرها وطبعا هتتشعبط فى حاجة فى المول وهتفضلى شايلاها لحد ايدك ما تقف..وتمشى شوية وتتعبى ويا سلام لو دخلتى سينما .تفضل بقى هيا تعيط او تحب ترضع وينتهى المطاف بيكى فى الاخر انك تطلعى من نص الفيلم واصلا الافلام كلها دلوقتى تجيب الضغط.يعنى هيا عملت فيكى معروف.المهم تزهقوا وتزعلوا ع الفلوس اللى ضاعت وتركبوا العربية وجوزك يقولك اركبى ورا احسن عشان البنت بتلعب فى الدريكسرون فتقومى وترجعى ورا وبنتك تفضل تشد فى طرحتك وتخلعها لك وجوزك يزعق لك ويقولك شعرك كله طالع بره يا هانم.واخيرا ترجعى بيتك هلكانة وزهقانة اكتر من الاول..عرفتوا ليه انا بحب البيت اوى.وعلى را ى المثل من خرج من داره اتقل مقداره