رسالة متاخرة اوى

وحشتنى اوى اوى..وحشنى صوتك وكلامك وحركاتك..ياترى لو كنت عايش لغاية دلوقتى كان هيبقى شكلك ايه.??.الشعر الابيض كان هيبقى حلو اوى عليك لكن للاسف انت رحت وانت لسه شاب..يمكن  اكون عمرى ما قلت لك انى بحبك رغم انى كنت حاسة بيها وكانت جوة قلبى اوى بس صغر سنى منعنى انى اقولها..(اعملك ايه بقى ماانت سبتنى وانا صغيرة اوى)..كنت بمشى معاك والدنيا ظلمة واقولك انا خايفة اوى يا بابا..وترد عليا بحنان وحب: طول ما انا معاكى ماتخافيش من اى حاجة فى الدنيا...لكن انت رحت وسيبتنى وبقيت بخاف بعدك من حاجات كتير اوى..كنت اتمنى انك تكون جمبى وتطمنى ..وحشنى حضنك ووحشنى دلعك ليا ووحشتنى الشكولاتة اللى كنت بتجيبها لى..كانت احلى شكولاتة  أكلتها فى حياتى..عشان انت اللى جايبها..كان طعمها كله حنان وحب..فيه حاجات كتيرة عايزة احكيها لك..وفيه حاجات نفسى اخد رايك فيها...ولو انى عارفة رايك فى  كل حاجة وعارفة انك عارف كل اخبارى لانك كنت بتجيلى فى الحلم تبشرنى بيها قبل ما تحصل..بتفائل لما بشوفك فى الحلم..بعرف ان فيه خير هيجيلى قريب..عدت عليا فترات صعبة وحلمت بيك ساعتها جاى تطمنى وفرحت انى شفتك ونسيت كل حاجة وحشة..وجيت بشرتنى قبل الحمل ببنتى..بنتى اللى كان نفسى انك تشوفها وتفرح بيها..كان نفسى بنتى تقولك يا جدو..كنت هتبقى احلى جدو فى الدنيا..بس انا واثقة انك حاسس بيها وفرحان كمان..اخر حاجة عايزة اقولها لك انى بحبك اوى وان مفيش اى حاجة فى الدنيا عوضتنى عنك وعن حنانك..الله يرحمك يابابا...

فيس بوك...نسخة مصرى

الشاب اللى اخترع الفيس بوك عشان يكلم صحابه ويتواصل معاهم عن طريقه ويسالهم(ياترى بتعملوا ايه دلوقتى؟) مكانش عارف ان اغلب المصريين بقى هيستخدموه استخدام مختلف وهوا (اوعى تخلى حد يعرف انت بتعمل ايه دلوقتى!!)او بمعنى اصح(اوعى تقول الحقيقة) وده عشان 3 حاجات..اول حاجة عشان الضرايب يعنى بلاش تكتب(انا اشتريت عربية جديدة)..وتانى حاجة عشان يزوغ من المدام براحته (انا فى الشغل دلوقتى والله وطالع عينى)..وتالت حاجة عشان الحسد..اصل العين وحشة برضه..ماينفعش مثلا تكتب ع ال wall
(انا خطبت يا جماعة)..اصل كده العيال صحابك هيقروا عليك وهيدوك عين من اللى هيا وتانى يوم تفسخ خطوبتك يا حلو..وتبقى غبى بقى الصراحة لو كمان نزلت صور خطوبتك..انت كده تبقى جبته لنفسه. ممكن تنزل بس صورتك وانت بتلبسها الشبكة عشان تذلها بيها بعد كده .ما ينفعش كمان تحط صور خطيبتك او مراتك اصل انت كده الصراحة يبقى معندكش نخوة...بالنسبة للبنات بقى ماينفعش يحطوا صورهم وماتقوليش ده اسمه فيس وفيس يعنى المفروض نشوف بعض..اصل المحروس جوزك مابيفرقش معاه الحاجات دى ولو اخد خبر ان حضرتك حاطة صورتك حتى لو كانت بالنقاب هيكسر لك اللاب توب وهيلغى اشتراك النت وابقى ورينى هتدخلى تكلمى صحبتك ازاى يا فالحة..(حطى صورة السنيورة بنتك وخلاص)
بالنسبة بقى للcomments يعنى التعليقات اللى الصحاب بيكتبوها لبعض..مثلا تلاقى واحد كاتب (مش عايز اروح الشغل بكرة..)))
اتفرجوا بقى ع تعليقات صحابه
اول واحد يعلق: وانا كمان مش عايز اروح شغلى اصل عربيتى مزنوقة فى الجراج ( وهوا بكده عايز صحابه وصحباته يعرفوا ان عنده عربية..هى ممكن تكون نص كم او حتى توك توك بس اهى عربية  وخلاص وبيتباهى بيها
تانى واحد كاتب تعليق غريب: كل عام وانتم بخير .الاولاد والجماعة عاملين ايه؟(طبعا ملاحظين انه بيتكلم عن موضوع تانى خالص)
تالت واحد معلق: هوا بقى فيه شغل اصلا..هيا الشباب لاقيه شغل..الشغل كله زى قلته وفى الاخر بتقبض كام يعنى!!
(ده واحد مخنوق وتعليقاته تخنق زيه)
واحد رابع بقى معلق: ((((loooooooooool
(هوا اصلا مش لاقى كلام يقوله..بس مايهونش عليه يسيب الcommentبتاعه فاضى.لازم يعلق اى تعليق)
وتلاقى ناس تعمل share لحاجات غريبة يعنى واحدة عاملة share لطريقة تشريح الضفدعة..طيب هيا فى كليه طب..مش لازم تقرف الناس معاها
والتانى عامل share لهدف ابو تريكة فى الانتاج الحربى..طب مااحنا شفنا الهدف قبل كده يا سيدى ولا انت لازم تفرس صحابك الزملكاوية وتموتهم بحسرتهم..
وتلاقى واحدة منزلة صورتها وهى بتتفسح مع جوزها عشان تغيظ صحبتها والتانية حاطة صورتها وهى فى المطعم وبتاكل بطاطس بالكاتشاب عشان اهلها يعرفوا ان جوزها مش بخيل وبيوديها مطاعم وكده..)
فيه ناس بقى الفيس بوك عندهم هوايه..24 ساعة فاتحينه لدرجة ان الراجل بقى بيتكلم مع مراته وبيتخانقوا سوا عليه رغم انهم مع بعض فى بيت واحد..
يسالها ع الchat: انتى مش سامعة تليفون البيت بيرن..ماتقومى تردى
تبعت له:ماتقوم ترد انت..انا مشغولة))
يبعت لها: ممممم مشغولة فى ايه يعنى؟؟قومى يمكن تكون امك تعبانة ولا ماتت(((
تبعت له: بعد الشر على ماما..وبعدين يمكن تكون امك انت
يبعت لها:لو امى هتكلمنى ع الموبايل
تبعت له:oops..من امتى مامتك بتتكلم ع الموبايل..الله يرحم
(وتلاقى صحابهم داخلين فى النص يسلكوا..)
صحابهم: يا جماعة صلوا ع النبى..الامور ماتتحلش كده!!
(وكل ده واللى بيتصل لسه برضه عمال يرن..غلس بقى نقول ايه)
وتلاقى البنات اشتروا كتب حكم ومواعظ وكل يوم يكتبوا حكمة تقولوش عباس العقاد
مرة تكتب ع الwall:ليس من الحكمة ان تكونى قمر بل الحكمة ان تكونى شمس
ومرة تقلب على خالتى فتكات وتكتب امثال شعبية
(اللى مايحبش اختى..مالوش خير فيا ولا فى اختى)
ومرة تقلب على فقرة الاعلانات( الراجل مش بس بكلمته ..الراجل برعايته لبيته واسرته) وهيا تقصد فرغلى جوزها اللى بقاله يومين بايت برة البيت..
وممكن تلاقيها كاتبة اغنية وده حسب حالتها النفسية..اصلك ممكن تعرف الحالة النفسية من الفيس بوك..
يوم تلاقيها كاتبة: الدنيا ربيع والجو بديع
ويوم تانى تتقمص دور المكتئبة: خسارة فيك قلبى.خسارة فيك حبى
وبين قوسين تكتب(واللى على راسه بطحة بقى)
طبعا هيا تقصد الواد ميدو اللى مطنشها بقاله يومين ومتصاحب دلوقتى على فوفو صحبتها اللى شعرها منكوش دى..
وتلاقى ميدو كاتب: مين حبيبى انا؟
وفوفو ترد: انت اللى بحبه انا.
(عايشين دور وائل ونوال)
انا مرة كتبت ع الwall :انا عايزة اكل كنتاكى
لاقيته بعد نص ساعة بيرن ع الباب..قلت له:ايه يا عم كنتاكى انا كنت بهزر..بكتب كلمتين من نفسى يعنى..ايه انتوا هتقفوا لى الكلمة ولا ايه..دى مكانتش كلمة قلتها..انتوا مابتصدقوا..
(خدوا بالكوا بقى احسن الفيس بوك باين عليه متراقب ولا ايه)

طنط اللتاتة والتليفزيون

استحالة اعرف اتابع حاجة فى التليفزيون لو كانت جارتى دى عندنا..ماينفعش اسمع جمليتن ورا بعض اصل ورا كل جملة لازم تسمع تعليق من طنط..وسبحان الله تبقى شايفة المسلسل عشرين مرة وفى كل مرة تسالنى نفس الاسئلة: ايه ده هوا جوزها خانها؟؟
اقولها: اه خانها هوا انتى اول مرة تشوفيه؟
ترد بخباثة:ما انا عارفة..بس بيخونها ليه يعنى؟
وهيا بالسؤال ده بتبقى طرحت موضوع الخيانة للمناقشة يعنى عايزانا بقى نتناقش وناخد وندى وكل واحدة فينا تقول رايها فى الموضوع..يبقى الاحسن اقفل التليفزيون بقى واسمع وجهة نظرها فى الخيانة حتى بالمرة اوفر فى الكهربا ..ولسه جاية اقفله..صرخت فيا: ماتسيبيه..دى الحتة الجاية حلوة اوى..ده انا مستنياها من ساعتها
قلت لها:ليه هيحصل ايه؟
تقولى:اصله هيندم دلوقتى..(طبعا هيا لازم تشوفه وهوا ندمان ومقهور.)..شفتى اهوا ندم اهوا بس يستاهل هوا عمل كده فى نفسه..شفتى؟؟
قلت لها:  ماانا شايفة اهوا
تقولى: اصلك مش واخدة بالك مراته كمان هتندم!!
 بعد شوية اقنعتها اننا نغير القناة بتاعة المسلسل العربى..وهيا اقتنعت بسرعة الصراحة وقالت لى مش مشكلة مااهوا بيتعاد مرتين تانى النهاردة( اصلها ناوية تعمل دكتوراة فى المسلسل)..وجبت قناة اغانى لاقيت اغنية لتامر حسنى..شكلها اغنية جديدة..طبعا جارتى لازم تعلق: هوا المغنى ده طول النهار قاعد فى التليفزيون؟
قلت لها: اه اصله واخد شقة ايجار جمب الاستديو وكل شوية يدخل يغنى ويطلع تانى..
قالت لى: انا سمعت الغنوة دى ميت مرة.اقلبى يا شيخة
قلت لها حاضر وقلبت لاقيت اغنية حلوة اوى لحماقى..ياسلام..قول يا حماقى قول..
طنط:ايه اللى هوا لابسه ده؟؟
انا: لابس جاكيت جلد..ماله؟
طنط:فى عز الحر ده ..هوا احنا فى طوبة
انا:اصله مصورها فى الشتا..مش واخدة بالك ان وراه جليد ومطر
طنط:.ايوة ماانا واخدة بالى..تصدقى الشتا واحشنى..مابقاش فيه مطر زى زمان( دخلنا فى النشرة الجوية)
انا: تصدقى انا بحب الغنوة دى اوى..(يمكن تحس على دمها)
طنط: بتحبيها على ايه؟والله ماانا سامعة منه ولا كلمة ولا فاهمة هوا بيقول ايه؟
انا: ماانتى لو سكتى شوية هتسمعى..انا هقلب الاغنية..واجيب لها فيلم اجنبى احسن عشان ماتفهمش حاجة  وتسكت شوية  بس ياريت ماتفضلش تسالنى هما بيقولوا ايه؟؟..حلو اوى الفيلم ده بحبهhome alone.(.يابخته قاعد لوحده مش معاه جارته وبيتفرج على التليفزيون براحته..)
طنط:بيسرحوا بينا..بقى عيل صغير هيعمل كده فى الحرامية(دخلنا بقى فى النقد والتحليل الفنى)
انا: فيلم بقى يا طنط وخيال وكده..اتفرجى اتفرجى هيعجبك
طنط:الحقى ده الحرامى وقع واتحرق ..يا خرابى..احسن..تستاهل يا حرامى..حرام عليك ده عيل صغير(المفروض انه سامعها وهيسمع كلامها)..انا حاسة انى بتفرج على تعليقات طنط اللى بيتخللها لقطات من الفيلم..ده انتى مملة اكتر من فقرة الاعلانات يا شيخة!!..
اجيب لها برنامج طبيخ احسن يفيدها..اهوا الشيف بيطبخ اهوا يا طنط..ركزى بقى واسكتى شوية عشان تتعلمى حاجة مفيدة..
طنط: هوا ده اكل برضه؟؟بيحط كبدة على لحمة على بيض..استغفر الله..الواحد هيجيب اللى فى بطنه..شكله حلو بس تلاقى طعمه مهبب..اقلبى  اقلبى ده انا بطبخ احسن منه.!!
ايوووة حلوة القناة دى مذيعة مستضيفة ممثلة مشهورة وبتقاطعها زى طنط بالضبط( محدش احسن من حد)..والفنانة الامورة بتتكلم عن فيلمها الجديد اللى حقق ارقام قياسية فى السينما ونجح نجاح ساحق لكن جارتى ليها وجهة نظر تانية :ولا نجح ولا حاجة ده فيلم مزفت ده انا دخلت نمت فى السينما و بعد شوية النور قطع. عمرك شفتى نور يقطع فى السينما؟؟اصلها ممثلة فقر من يومها..والله خسارة فيها العشرين جنيه اللى دفعتهم.!!..خلاص يا طنط احنا نتفرج على مسلسل نور التركى احسن يهدىء اعصابك وينسيكى العشرين جنيه..اهوا مهند بيصالح نور يا طنط اتفرجى..طنط طلعت فيا: بيصالحها على ايه؟من جمالها!!ده احلى منها..وبعدين دى بت فقرية طول المسلسل تتخانق معاه..ايه النكد ده ويقولوا الستات بتوع مصرغاويين نكد طب ازاى ؟اومال ستات تركيا يبقوا ايه بس؟؟
اعمل ايه طيب؟..طنط مش راضية تعمل فاصل خالص!  احسن حاجة اجيب لها كارتون توم وجيرى واهوا ماشى مع الجو اللى احنا فيه..
طنط: الواد جيرى ده سوسة..كل المصايب جاية من وراه..يابنى حرام عليك.ربنا يهدك..وانت يا قط يااهبل..سايبه كده يهزئك..ايوة كده خد حقك..عسل والله..اضربه ..اضرب جامد ماتخافش..اسم الله عليك يا توم..ربنا يحفظك
(يارب جيرى يطلع م التليفزيون ويضربك.. او النور يقطع بقى ونخلص...مفيش قناة جايبة نتيجة..اجيب لها قناة ايه بس؟؟)
..طبعا عمرى ماهجيب لها كورة..عشان ساعتها طنط بتتحول لمشجعة متعصبة اوى وتفضل تشتم وتزعق ولا العيال اللى فى الشارع..احسن حاجة اجيب لها مصارعة حرة..ولا بلاش..الطيب احسن ..اجيب لها  احسن برنامج يكون دمه تقيل عشان تزهق.. برنامج  علمى اهوا ويخنق والمذيعة بتتكلم عن الشاى الاخضر
طنط: والله مابحب الشاى الاخضر ده ولا بقبل له ريحة
المذيعة: ازاى كده .ده مفيد اوى فى التخسيس
طنط: ولا بيخسس ولا حاجة..ده كلام
المذيعة:لاء يا حاجة جريبه بس الاول(0اصل انا بتخيل المذيعة وهيا بترد على طنط لان طنط بتعلق على كل كلمة كانهم قاعدين سوا ع القهوة)..واللهى جارتى دى حلال فيها نشرة الاخبار..انا هجيب لها النشرة واحبسها لوحدها فى الاودة واهوا تشتم فى اوباما ونتينياهو براحتها..ويمكن شقتنا تكون متراقبة ولا حاجة ويجوا يمسكوها ونخلص منها..سلام يا طنط...انا هروح اتفرج ع الاعلانات فى الاودة التانية..موبايلات بقى..

وطارررررت البالونة!!

نزلت مع بنتى الصغيرة عشان نشترى شوية حاجات بسيطة للبيت...وقلنا ناخد المشوار مشى واهى رياضة والمكان قريب من البيت..ولمحت الراجل اللى بيقف يبيع بالونات فى الشارع..وده راجل معاه بالونات كتيرررررة طويلة كده ومبعجرة وحاولت ادخل من شارع تانى عشان اهرب منه لكن للاسف بنتى السوسة لمحته.(.يا مامى انا عايزة بالونة عشان خطرى.)...وحاولت اقنعها ان البالونة كبيرة اوى وهتلخمنا لكن مفيش فايدة وقربت من الراجل بتاع البالونات وقلت لها: يظهر انه نايم ..مفيش نصيب بقى ياللا بينا.....لكن الراجل ابن اللذينا نط من ع الكرسى وعايز يقولى(انت هتستعبطى)..ووجه الكلام للزبونة الصغيرة: عايزة كام واحدة يا امورة؟؟..نعم يا خويا هيا واحدة كفاية اوى عشان نعرف نشيلها..ومشينا من عنده والبنت ملخومة بالبالونة وماشية تخبط فى الناس .الاول خبطت فى واحدة ست حامل.الست صرخت فى وشنا: هوا انا ناقصة.....وشوية وخبطت بالونتها فى راجل كبيركده ومحترم..الراجل كان هيقتلنا.: مش عارفين تربوا عيالكوا خلاص بتخلفوا ليه؟؟..(ايه يا حاج انت هتدينى درس فى الاخلاق..دى بالونة يعنى مش طوبة وبعدين انا مدايقة منها اكتر منك)..ومشيت انا وبنتى والبالونة ويظهر ان الهوا كان جامد شوية والبالونة كانت هتطير  وبنتى ماسكاها جامد كانها ماسكة بندقية والهوا كل شوية بيزيد لغاية ما البالونة طارت..يا ربى البالونة طارت (الحمد لله)..وبنتى اتفتحت فى العياط والناس عمالة تشاور علينا وناس تقول امها ضربتها وناس تقول شكلها خاطفاها اصلها مش شبهها خالص لو ركزتوا( انت هتعمل فيها المفتش كرومبو؟ ) ..المهم الشاويش اللى كان واقف تقريبا صعبنا عليه ووقف كل العربيات مخصوص عشانا(راجل محترم الحقيقة..اه لو يعرف)..وقالنا عدوا بسرعة بقى..قلت له لاء احنا بندور ع البالونة. مش عايزين نعدى..!.طبعا سمعت ساعتها اروع كلام سمعته فى حياتى من الشاويش ومن العربيات وكله عمال يزمر ويصرخ ويدعوا علينا و اللى يقول البلد باظت يا جدعان واللى يقول هما الستات كده مايجيش من وراهم غير البلاوى..(ايه يا جدعان كل ده عشان بالونة واللهى انا زهقانة اكتر منكوا).وفضلنا وانا وبنتى نجرى بين العربيات كاننا بندور على عيل تايه..لغاية ماشفتها اهى منورة هناك اهى..فضلت تطير لغاية مااستقرت فوق اشارة المرور(بالونة منضبطة) حاولت انط عشان اجيبها بس ماطولتش وخفت اتكعبل واقع على وشى..قام الشاويش الغلبان(الله يعمر بيته) جابها ولسه هيديها لى طارت منى تانى.؟(معلش اتزحلقت منى)..المهم الشارع كله بقى يتنافس ع البالونة تقولوش فريق كرة طايرة..الكل بيجرى وبينط وعايز يلحق.(على فكرة لو وجهنا اهتمام الشباب للكرة الطايرة هننجح  اكتر من كرة القدم) والناس فرحانة بالبالونة كانهم ماصدقوا وبنتى شغالة عياط(يابنتى انا مدايقة اكتر منك)..والعربيات كلها وقفت تتابع المباراة..ولاقيت واحد بيقول لصحبه تقريبا فيه شخصية مهمة معدية(طبعا هوا فيه اهم م البالونة!)..وسمعت واحد بيتفلسف:احنا فى زمن البالونات(مش طالبة فلسفة خالص).ولاقيت اطفال عاملين مظاهرات(احنا كمان عايزين بالونات ).. المهم فى الاخر عشان مااطولش عليكوا احب اطمنكوا ان الفريق بتاعى فاز واخدت البالونة اخيرا...ودخلنا المحل عشان نشترى االطلبات..ربنا يعدى اليوم ده على خير يارب..هوا المحل زحمة ليه كده..اه اصل النهاردة الخميس...هوا فيه ايه يا جماعة كلكم متنحين للتليفزيون ليه كده؟؟..صاحب المحل قالى: اصل فيه عملية ارهابية حصلت فى شرم الشيخ...0(ليه كده بس احنا ناقصين)..وفجاة سمعنا فرقعة جامده اوى فى المحل..الناس اترعبوا..يا خرابى يا لهوى..الحقونا..عمليه ارهابية..قنبلة فى المحل...صاحب المحل خايف: انبطحوا انبطحوا كلكم.. وسمعت راجل بيقول للتانى: هما الارهابين ايه اللى جابهم هنا بس..وست بتقول لجوزها ف التليفون: الحقنى فيه متفجرات فى المحل..فيه ارهابين هنا..الحقنى يا مرسى.(وطبعا مرسى ماصدق يخلص م المدام)..وواحد كبير بيعيط وبيقول انا كان قلبى حاسس انى هيحصلى حاجة النهاردة..وسمعت واحد بيوصف لمراته فى التليفون شكل الارهابى المعتوه( هوا ده وقت اشتغالات برضه)..يا عينى الناس اتجننت خلاص.. بس الصراحة ماردتش اقولهم ان مفيش قنبلة ولا حاجة!! وان السبب هوا بالونة بنتى اللى فرقعت!(اصلها فرقعت غصب عنها والله..)...وخفت اعترف لهم  يبلغوا عنى البوليس وممكن مايصدقوش موضوع البالونة واكيد مش هيصدقوه طبعا وهيحولونى ساعتها على حد يكشف على قواياى العقلية ومش بعيد يودونى مستشفى الامراض النفسية والعقلية..ولو فضلت احلف لهم من هنا للسنة الجاية انها بالونة مش قنبلة مش هيصدقونى...عشان كده قررت انى اسيبهم  يعيشوا التجربة المثيرة دى.. يعنى بوليس وقنابل وارهابين...wow...حاجة جديدة برضه وروشة...وخدت بنتى وطلعنا نجرى قبل البوليس ما يجى...بس ربنا يستر بقى والراجل بتاع البالونات مايبلغش عننا

خمس شخصيات واستك

انا عندى اكتر من شخصية..بس مش معنى كده انى عندى كذا بطاقة..لكن اقصد انى بتعامل مع كل شخص حسب شخصيته يعنى الشخص المرح اللى بيضحك بكون معاه عسل ودمى خفيف واضحك عمال على بطال زى الهبلة..والشخص الرخم ودول كتيييييييير بكون رخمة معاه ده حتى بكون ارخم منه وافضل اتنافس مين فينا ارخم من التانى ؟؟..البنت اللى دمها تقيل بيكون دمى معاها اتقل م الفيل ابو زلومة..والبنت المتفائلة ببقى معاها متفائلة يمكن اكتر من ايليا ابو ماضى نفسه..والشخصية المتشائمة بكون متشائمة اكتر منها وافضل اقول مفيش فايدة مفيش فايدة ولا سعد زغلول فى زمانه....ساعات بقول لنفسى انا كده يبقى ماليش شخصية..انا مجرد رد فعل او صورة مستنسخة من اللى قدامى..لكن نفسى التانية ترد ع الاولانية وتقولها بالعكس انتى كده بتتكيفى مع كل الشخصيات انتى كده مرنة اوى..تقوم الشخصية التالتة جوايا ترد وهيا متعصبة اوى..انتى كده تبقى زى الحرباية كل شوية بلون... انا لسه ماعرفتكوش على شخصياتى..اصل انا جوة منى حوالى خمس شخصيات تقريبا..والشخصيات دى دايما بتتخانق مع بعضها وافضل اسلك بينهم اصلهم مش طايقين بعض خالص..اعرفكم بالشخصيات..اول شخصية دى مسئولة عن العلاقات العامة مع الناس.يعنى علاقتى باهلى واصحابى...ودى بتظهر اول مابتكلم مع حد او اقابل حد..وهيا دايما بتحاول تحسن من علاقتى بكل الناس..وتلفت نظرى اول مااتكلم بطريقة وحشة او اغلط فى الكلام او اتخانق مع حد وبتبقى هيا السبب..اصلها ساعات بتبقى متسرعة كده ومندفعة وبتتكلم كتير وبتغلط...متبهدلة اوى معايا الشخصية دى.
الشخصية التانية..وهيا المسئولة عن اتخاذ القرارات فى حياتى..اول مااجى اخد اى قرار سواء مهم او هايف الاقيها ظهرت..والشخصية دى اغلب كلامها ياريتنى .وانا اللى غلطانة..مكنتش اعرف..مااهى اصل اغلب قراراتها بتطلع غلط فى الاخر ودايما ندمانة طول الوقت
الشخصية التالتة..الشخصية المبدعة..ودى مسئولة عن الافكار والمواضيع وهيا الدماغ اللى بتجيب لى الالهام كله.ودى تعبانة اوى معايا..نفسها مرة فى اجازة م التفكير..ياعينى على طول عندها صداع ودايما سرحانة وبتفكر..
الشخصية الرابعة..دى احب شخصية ليا لانها شخصية ترفيهية..مسئولة عن الضحك والفرفشة..طول النهار تزن كانها طفلة صغيرة..عايزة اخرج..عايزة اتفسح..عايزة اسمع اغانى..فاضية بقى ورايقة وعايزة هزار طول النهار..بس محدش فاضيلها ..هيا الحياة كلها هتبقى لعب..
اخر شخصية ..بخاف وبتهرب منها..شخصية مثالية..وهى رمز الضمير..الشخصية دى بتخنقنى.طول النهار تعاتبنى وتبستف فيا حتى لو عملت حاجة كويسة..مفيش حاجة من تصرفاتى عجباها..زهقتنى..اجى اصلى..تقولى انتى سرحتى فى الصلاة..اتحجب..تقولى وده اسمه حجاب برضه..نص شعرك باين ولبسك ع الموضة..اجى اسمع اغنية من نفسى .تقولى كنتى اتفرجتى على برنامج دينى ينفعك..
دلوقتى مثلا انا عايزة اشغل الكمبيوتر شوية..اول شخصية بتاعة العلاقات العامة قالت لى:يعنى تسيبى جوزك قاعد لوحده وتطنشيه وتشغلى الكمبيوتر..
الشخصية التانية  بتاعة القرارات ماعجبهاش الكلام فقالت: ماتفكريش فى حد وخدى القرار وشغلى الكمبيوتر هوا انتى لسه هتفكرى.؟(مااهوا تسرعك ده ياختى اللى بيودينى فى داهية)
الشخصية التالتة بتاعة الشغل طلعت وقالت لى: كويس اهى فرصة تكتبى قصة ع الكمبيوتر وتستغلى الوقت فى حاجة مفيدة(ماشى يا ختى مش بتفكرى انتى الا فى مصلحتك)
الشخصية الرابعة الترفيهية قالت لى: بلا قصة بلا بتاع ماتوجعيش دماغك.هوا انتى لسه هتفكرى وتكتبى..ادخلى اسمعى لك كام اغنية كده وخليكى روشة.(بموت فى الشخصية دى وبعشق كسلها. ..حبيبتى حبيبتى .ودمها خفيف على قلبى اوى الصراحة..بس شخصيتها ضعيفة دايما تخسر فى الاخر نفسى مرة تمشى كلمتها)
الشخصية الخامسة الرذلة طلعت لى..شخصية مثالية بقى..قالت لى وهيا متعصبة: يعنى تسيبى بنتك تعيط وجوزك زهقان والمطبخ مكركب مواعين وتشغلى الكمبيوتر..روحى اسالى جوزك لو عايز يشرب حاجة ولا روحى لجارتكم الى ابوها مات عزيها  خلى عندك دم(نكدتى عليا يا شيخة ..دايما تفوقينى كده)..جوزى بيبص لى ومستغرب..بقى لى حوالى ربع ساعة متنحة للكمبيوتر..بيسالنى: انتى هتشغليه ولا لاء.مالك سرحانة فى ايه؟؟..قلت له: وانت فاكر ان تشغيل الكمبيوتر ده حاجة سهلة؟
الراجل هيتهبل: اضغطى على power...
قلت له: مش دى المشكلة بس اصل انا لسه مستنياهم لما ياخدوا قرار..
الراجل تنح وافتكرنى مخاوية جن ولا حاجة. وقعد يقول: لا حول ولا قوة الا بالله الست اتجننت. ....المهم فضلت فى الصراع ده حوالى نص ساعة وفى الاخر سبت الدنيا تضرب تقلب وسبتهم يتخانقوا مع بعض وقلت ادخل اجيب حاجة اكلها..وما استجبتش لنصايحهم فى انى  لو اكلت متاخر كده ممكن معدتى تتعبنى  ووزنى هيزيد وجوزى احتمال يكرهنى...وصرخت فيهم: جعانة وعايزة اكل بقى..؟جوزى قالى: ماتاكلى بالهنا والشفا ...اتعصبت عليه: هوا انا بكلمك انت؟؟..الراجل اتاكد رسمى انه عايش مع واحدة مناخوليا..(طبعا عارفين ان الشخصية الترفيهية هيا اللى قالت لى كلى براحتك واتخنى براحتك..اصلها شخصية عسل وقلبها عليا اوى")

خارج نطاق الخدمة

....ترن ترن ترن
-الووووو..ايوة يا محمد ازيك..اخبار الشغل ايه؟؟
-تمام الحمد لله خير فيه حاجة؟؟
-لاء ماتقلقش ..بس عايزة ادردش معاك شوية
-اههه..شكلك رايقة..انا موش فاضى..سلام دلوقتى وهكلمك لما افضى
-مااااااااااشى..ولا يهمك..سلاااااام
( هوا الشغل يعنى هيطير..!!الشغل ولا مراتك يعنى!!.مفيش برضه زى الام..انا هكلم ماما حبيبتى)
ترن ترن ترن..
-الووووو.. ازيك يا ماما..عاملة ايه؟؟
-ازيك انتى يا حبيبتى..وايه اخبارك؟؟
-انا الحمد لله كويسة عندى اخبار حلوة عايزة ادردش معاكى شوية..الوووو..ماما انتى رحتى فين؟؟
-معلش يا حبيبتى اصلى جارتى سامية عندى..بصى يا روحى لما تمشى هبقى اكلمك  وندردش براحتنا..اصل سامية دى قرارة وعينها وحشة اخاف تحسدك يا قلبى...
-ماشى ماشى..ولا يهمك خالص..سلاااااااام
( ادى الامهات يا ناس!!  جارتها اهم منى يعنى..امهات اخر زمن!!.هيا اختى حبيبتى اللى هتسمعنى..هوا فيه بعد الاخوات؟؟)
...ترن ترن ترن
-الووووووو..ازيك يا دودو..وحشااااااااانى موووووت
-بصى يا حبيبتى هروح اتابع الرز بس احسن يشيط
-طب ما توطى عليه وتيجى تدردشى معايا شوية
-لاء اصلى ايدى مشغولة وبقلى سمك..هكلمك بعد الغدا يا قمر
-لا لا براحتك براحتك..سلاااااام...
(خلى بقى السمك ينفعك ..تبيعى اختك عشان اكلة سمك اومال لو كانت بامية باللحمة كنتى عملتى ايه؟)
فيه ايه هوا محدش فاضيلى النهاردة..كلهم busy ...شكلى بقى وحش اوى...كلهم حاطينى علىwaitting ولا ايه؟؟... هيا بقى طلبت معايا اتكلم مع حد..يارب الاقى حد available....
...مفيش غير البت مروة صحبتى..رايقة وفاضية و مفرفشة وهتسمعنى
ترن ترن ترن
-الووووو..ازيك يا ميررررو وحشانى اوى ..فينك؟
-عايشة
-اوعى اكون معطلاكى عن حاجة ولا كده؟؟
-لا انا فاضية خالص..هوا انا بقى ورايا حاجة
-متاكدة؟
-يا ستى فاضية..اهى اهى اهىءء
-مالك بتعيطى ليه؟؟
-انتى ما عرفتيش اللى حصلى مش جوزى طلع بيخونى ..لا وبقى له سنتين وانا كنت نايمة على ودانى
(اه شكلها قلبت غم) معلش يا مروة ولا يهمك..المهم كنت عايزة احكى لك
-مش مهم ايه..يعنى بعد كل اللى عملته عشانه يعمل فيا كده؟؟ قليل الاصل وغدار..منه لله منه لله
-(ايه الجو ده؟؟..يا ستى انا مكلماكى عشان انا اللى اتكلم مش حضرتك)..سيبك منه بس واسمعينى
-ازاى يعنى؟؟ انا اكتر حاجة اكرهها الغدر..اصلك ما جربتييييييييش
-(الله اكبر..انتى هتقرى عليا يا ختى..انا غلطانة انى كلمتك..يا ريتك ما كنتى فاضية)..ما تزعليش نفسك..بكرة تتجوزى واحد احسن منه
-بعد ايه..بعد ما ضيعت احلى سنين عمرى
-(طب اعمل ايه..انا اتخنقت..انا كنت مفرفشة ..يعنى يا ربى الوحيدة اللى الاقيها فاضية برضه تطلع مش فاضية ..).. معلش يا ميرو ما تعمليش فى نفسك كده..كل الرجالة كده(اموت واعرف الست بتاعة لقد نفذ رصيدكم راحت فين؟)..ايه ده ايه ده..مين قليل الذوق اللى بيرن عليا دلوقتى..هوا ده وقته يعنى؟؟..هوا انا عندى كام مروة بس!!شكلى كده هكسر الموبايل ده وارتاح منه(لازم ابالغ بس عشان تصدقنى)
-خلاص بقى ما ترديش وخلاص
-(ده انتى باردة يا شيخة)...على رايك..ساعة الحظ ما تتعوضش ..استنى كده لما اشوف مين..ايه ده معقوله دى ماما اللى ع الwaitting..معلش بقى يا ميرو طلعت ماما..وانتى عارفة الا الام طبعا..انا اطنش وأcancel  اى حد الا امى حبيبتى..دى حملتنى فى تسع تشهر..لاء تقريبا سبعة بس...ورضعتنى كمان.. صحيح صناعى بس سهرت جمبى وكبرتنى...بصى يا روحى هرد عليها واكلمك تانى..اوعى تنامى..هكلمك على طووول....سلااااااااااااااااام يا حبيبتى ...(وابقى قابلينى لو عبرتك تانى)..انا خارج نطاق الخدمة..

عايزة اقعد مع نفسى شوية

نفسى اقعد لوحدى ولو خمس دقايق بس..بلاش خمس دقايق..تلات دقايق..دقيقة حتى..اسرح فيها مع نفسى..استرجع مثلا ايام الطفولة..استرجع ايام الجامعة..استرجع اى مواقف ظريفة فى حياتى..استرجع لحظات نجاح او لحظات فرح وبهجة..طب  بلاش الذكريات..افكر شوية فى مستقبلى..فى الحاجات اللى بفكر اعملها..فى مشروعاتى اللى ناوية انفذها..افكر فى احلامى واتخيل نفسى واخدة جايزة نوبل فى الادب...يا سلام..ابقى لابسة طقم شيك كده لونه pink اصلى بحب اللون ده اوى..وبعد كده اطلع ع السلالم واسلم ع الاستاذ اللى هناك (تقريبا يبقى ابن عم نوبل)..ويدونى جايزة فى علبة حمرا كده قطيفة وشهادة تقدير ولا حاجة عشان ابروزها واحطها فى اودتى..انام واقوم الاقيها فى وشى..يا سلام..يارب(ترن ترن..التليفون بيرن)يكونش عم نوبل بيتصل بيا؟ لالا مش قوى كده..(الووووووووو..)دى طلعت واحدة صحبتى بس رغاية اوى...يوووه طلعتنى م المود خالص ...خلصت معاها ورجعت احلم تانى ..حلمت ببناتى واتخيلتهم فى الكوشة بفستان الفرح..الله هيبقى شكلهم حلو اوى..وتبقى القاعة كبيرة وفيها بوفيه مفتوح كبير اوى.(عايز كوباية شاى؟)..ما ترووح يا سيدى تاخد م البوفيه..(بوفيه ايه؟؟)اههه اسفة اصلى سرحت شوية..انت عايز شاى..حاضر ثانية واحدة..وادخل اعمل الشاى لجوزى واكمل سرحان..اتخيل بنتى وهيا حامل وكعبورة كده..يا عسل دى هتبقى طعمة اوى..(كل ده فى كوباية شاى؟؟قدامك قد ايه؟)..تسع تشهر بس وهيعدوا بسرعة..(نعم تسع ايه انتى بتزرعى الشاى ولا ايه؟)..حاضر حاضر اتفضل اهوا...ويا سلام بقى لو جابت بنت او ولد..هيبقوا قمر زيها..وتسمى المفروض بنتها على اسمى والولد على اسم ابوها..ولا بلاش جهل..تسمى اللى هيا عايزاه مش عايزة اخنقها...ده عيالها اصلا هيبقوا سكررررررر..(انتى كمان مش حاطة سكر؟؟)...اه اه اسفة معلش..كام معلقة..(اتنين حلو اوى)..حاضر..ويا سلام لما تروح تطعم عيالها ويعيطوا وماتعرفش تنام منهم..(ايييييه انتى مش سامعة البت عمالة تعيط؟؟)...مين بنت مين ؟؟طب ماتديها لمامتها؟؟(مامتها؟؟اومال انتى تبقى مين؟؟)...معلش معلش..سرحت شوية(ايه موضوع السرحان ده؟؟ انتى بتفكرى فى ايه اوى كده؟)..المهم رحت للبت اللى بتعيط..ياااااااه ده انا كنت متخيلاكى شايلة بنتك دلوقتى وبترضعيها...كنتى أم حلوة وحنينة اوى..(واءواء واءءء) طيب اصبرى اصبرى..وتخيلت انى بتخانق مع جوزها:انت مزعل بنتى ليه؟؟ومش بتفسحها كتير ليه؟؟خد بالك منها بدل مااشوف شغلى معاك..(واءء واءءءءء)..يا بنتى اصبرى هجيب لك حقك اهوا..صبرك عليا:لازم تعرف ان انا مدياك اغلى حاجة عندى فى الدنيا كلها..(واااء وااءواءءءءءءءءء)..يا بت ماتعيطيش كده ماتخليهوش يحس انك ضعيفة..(فيه ايه البت جعانة عايزة ترضع..وبنتك التانية لبسيها عشان اخدها معايا وانا خارج..وانا بقى لى ساعة بدور على فردةالشراب مش لاقيها..وعايز كوباية شاى تانى )...حاضر ثوانى ثوانى..وانتى يا بنتى اهتمى بنفسك شوية كده وخليه يشوفك على طول حلوة بدل ما يبص لبرة..(الحقى البت وقعت من ع السرير)..يا حبيبتى..ركزى شوية كده وصحصحى..بلاش الخيبة دى!!شايفة اختك عاملة ايه مع جوزها..(يا بت ابعدى عن اختك يا بت هتوقعيها تانى).يا جماعة سيبونى احلم شوية ..سيبونى اخد جرعة احلام كبيرة اقدر بيها ااعيش الواقع واستحمله..هوا كتير خمس دقايق؟؟.(انا اتاخرت؟؟ مالقيتيش الشراب برضه؟؟)..حاضر حاضر..بلا احلام بلا وجع دماغ...!!