لما زينة تنام

زينة ده اسم بنتى الصغيرة.وطبعا كلنا عارفين انى ما بعرفش اعمل حاجة منها.لانها على طول لازقة لى.مثلا امسك الورقة والقلم عشان اكتب فتخطف القلم منى وترسم على رجلها والجدران بتاعة الشقة لغاية ما جدران الشقة بقت فن سريالى خالص..كانها لوحة فنية..ويا سلام لو حبيت اشغل اللا بتوب شوية طبعا هتنط علياوتفضل تقفل لى الصفحات وتلعب فى الشاشة وتبوس نفسها فى الكاميرا والشاشة تغرق ميه من اثر بوسة زينة.المهم زوزو حبيبتى نامت من حوالى ربع ساعة كده.وانا بقى محتارة اعمل ايه ولا ايه.انظف الشقة.لا لا.ابقى انظفها وهيا صاحية.طب اغسل المواعين.لا لا.لما تصحى تبقى تقعد جمبى وانا بغسلها.انا عايزةاعمل حاجة فيها مزاج وادلع نفسى شوية بقى..اه اقرا بقية الكتاب اللى فى ايدى(ميس ايجيبت)ده اسم الكتاب والله.ولا اقولكوا اشغل اللابتوب شوية وافتح مدونتى واعيش حياتى بقى واكتب شوية.اه صحيح انا بقى لى يومين عايزة اخد دش .بس عادى ممكن ابقى اخد دش معاها.انا هكلم واحدة صحبتى وحشانى اوى ومش بعرف اكلمها عشان زينة طبعا بتموت فى اختراع التليفون ده بكل انواعه لاسلكى موبايل .خلاص حلوة الفكرة دى هتكلم فى التليفون..لا لا هاكل الشكولاتة اللى انا مخبياها منهاعشان بتبهدل نفسها لما بتاكلها..اقولكوا هقرا شوية قران وادعى .بس ما انا بعرف اقرا وهيا صاحية وبتقعد تدعى زييى وتقلدنى.انا عايزة اعمل حاجة يكون استحالة اقدر اعملها وهيا صاحية..ايه بقى الحاجة دى.ايه يا ترى.فات نص ساعة ولسه ما عملتش حاجة ..اه اه.عرفت هعمل ايه..هدخل انام جمبها وارتاح شوية وخلاص..

الحروف الاولى

جلست تتذكراشخاص مروا بحياتها وامسكت بالورقة والقلم-وعلى الفور قفز الى خيالها اول شخص اعجب بها..وكتبته م.ن انه كان يحبها بالنظرات فقط.لم يكلمها ابدا ولم يسعى للتعرف عليها..شعرت انه جبان ولم يحبها بالقدر الكافى..تذكرت صديقتها د.ج كانت جميلة وتحبها ولكن كانت مجنونة وتركتنى فجاة وبدون اسباب.ثم عاودت الاتصال بعدها.لم افهم شخصيتها.تذكرت س الذى راها مرة واحدة وكاد يجن ليتعرف عليها ولكن سرعان ما نساها بنفس سرعته بالتعلق بها.شطبت حروفه.لا يستحق ان تكتب عنه.تذكرت صديقتها ر.م الرقيقة خفيفة الدم اشتاقت اليها بشدة كانت تحب كلامها وجمالها الهادىء وسخريتها من جميع من حولها واحيانا من نفسها .كانت تعشق الابراج.ستكتب بجوار حروفها اسم برجها.وسرعان ما تذكرت ن الشاب الوسيم الذى اغرم بها وترك صديقته من اجلها.كانت تخاف منه.وتهلاب منه.فربما يتركها من اجل فتاة اخرى.ثم تذكت أ.ب الذى احبها واخبر صديقتها بذلك وسرعان ما وقع صديقه ايضا فى حبها.ولم يخفق قلبها لاى منهم.وتذكرت ج.ج كان طيب جدا تذكرت ملامحه وطريقة كلامه .كان متمسك بها لاقصى درجة.ولكن لم تستطع ان تحبه رغم امكانياته المرتفعة وشقته الكبيررة..وشعرت بفرحة عندما تذكرت صديقتها ه. ع الانيقة جدا والطيبة. كانت تحثها دائما على الخروج والتنزه والتصوير.متفائلة وتحب الحياة مثلها.ستكتب بجوار حروف اسمها تاريخ اخر صورة لهما معا..وشعرت بسعادة عندما تذكرت ه.م صديقتها الاخرى الشقية جدا والطفلة..اعشق طفولتها ومرحها وشعرها الطويل.وشعرت بغضب عندما تذكرت أ. ع الذى احبها واحب غيرها فى نفس الوقت.وتملكها شعور بالغيظ منه.كيف لشخص ان يحب اثنان فى وقت واحد..شطبت حروفه فهى لا تريد تذكره..وتذكرت ع الذى كان يثور جدا لكرامته وثار عليها عندما رفضته..كان شخص معقد.وضعت علامة خطا بجوار اسمه.وضحكت بشدة عندما تذكرت م.س لقد كان خفيف الظل .تقريبا اظرف شخص راته.كان يحاول اخبارها بحبه لها بطريقة كوميدية.كان يضفى نوعا من التهريج على كلامه حتى لا يصاب بالاحراج من رفضها له.كانت تعتز به كصديق.كتبت حروفه ورسمت بجوارها ضحكة..ولمعت عيناها عندما تذكرت م .ف كان رقيق المشاعر ويكتب لها شعر.اختلق فرصة ليتعرف عليها.لم تستطيع ان تبادله مشاعره.تهربت منه.طلبت منه ان يصبحا اصدقاء.ولكن مستحيلة هذه الصداقة.شعرت بالسعادة عندما تذكرته ولكن سعادة ممزوجة بالاحراج والالم.دمعت عيناها وبللت حروفه الاولى .كانت تشعر بصدق مشاعره لها..واخيرا كتبته ..كتبت حروفه الاولى .اهم من قابلته.انه م.ص الذى احبها .وسعى اليها.لم يياس.ظل يحاول ويحاول.اعجبها.اعجبت باصراره.تعلقت به.وجدته رجل بمعنى الكلمة.تستطيع ان تعتمد عليه.لم تحاول ان تقارنه باى شخص تقرب منها او احبها.المقارنه دائما فى صالحه.انه اكثر من احبها..الباقى شطبتهم.كانوا اشخاص خطا او جاءوا فى وقت خطا..وضعت امامهم جميعا علامة خطا.اما هو فلم تكتفى بكتابة حروفه الاولى فقط.لانه يستحق ان تكتب اسمه كاملا...

نهاية الاشياء

بحب بداية اى حاجة ..بداية اليوم والشمس طالعة زمشرقة بتدينى حيوية وتفاؤل وسعادة..وكل ما الليل يقرب بحس باكتئاب بسيط.وبحب اول الاسبوع السبت والاحد والاتنين ولما يقرب يخلص بزعل اوى الا فى حالة لو كنت مستنية حاجة معينة وعايزة الايام تجرى بسرعة.ودايما البداية فى اى حاجة بتبقى احلى حاجة..يعنى لما تيجى رايح رحلة مثلا وتوضب فى الشنط وتحاول ما تنساش حاجة وانت مسافر وتجهز نفسك للرحلة.اهوا ده بيبقى احلى من الرحلة نفسها.الاستعداد للرحلة.حتى فى العلاقات الشخصية دايما الارتباط فى الاول والخطوبة بتبقى احلى ايام واحلى مشاعر وبيبقى فيها اللهفة والشوق والاندفاع .صحيح كل مرحلة ليها حلاوتها.بس فى الاول احلى برضه.ده حتى لما تجربى تطبخى اكلة لاول مرة لازم تطلع حلوة وبيسموه (حظ المبتدئين) والتجهيز للاكل زى المحشى مثلا ممكن ياخد منك يوم كامل وفى الاخر يتاكل فى ثانية.المتعة بقى ما كانتش فى اكله.لكن كانت فى تجهيزه وتجهيز الحشو ولف ورق العنب ورصه فى الحلة.انا دايما بحب بداية الاشياءوبحب التجهيزات والاستعداد لاى حاجة.وبكره نهاية الاشياءوبكره كلمة النهاية..الا لو كانت مرحلة وحشه اوى الواحد مستنى فعلا انها تنتهى لكن مش عشان تنتهى بس لكن عشان برضه تبتدى مرحلة جديدة احلى

مرحلة مؤقتة

دايما لما حاجة بتدايقنى فى حياتى وببقى مش راضية عنها احاول اقنع نفسى ان دى مرحلة مؤقتة وهتعدى
وان بتمردى واصرارى وايمانى بربنا الوضع ده هيتغير00
وده حصل لى فعلا فى حاجات كتير مثلا لما تعدى عليا فترة من حياتى مدايقة نسبيا منها00بفضل اقنع فى نفسى ان الفترة دى هتعدى زى فترة شهر 4 و 5 بتبقى مملة اوى وبستنى الصيف واتخيل المصيف والرحلات وممكن كمان ابدا استعد للمصيف من قبلها بشهرين00ومثلا ايام المذاكرة كنت اقنع نفسى ان الامتحانات قربت وهانت00ومدام الامتحانات بدات خلاص هتجرى بسرعة0وتيجى فترة الامتحانات واحس كانى عروسة وابقى فرحانة اوى وعلى سنجة عشرة وفرحانة انى همتحن واخلص ومثلا لما كنت حامل00بيقولوا الحمل بيعلم الصبر00كنت مستعجلة اوى ع الخلفة وقبلها كنت مستعجلة اصلا على الحمل00المهم وانا حامل كانت اختى تسالنى انتى فى الكام دلوقتى؟
اقولها السابع
تقولى ازاى انتى بتستعبطى؟
قلت لها تقريبا يعنى بقى لى حوالى شهر الا اسبوع ع السابع
يعنى ببساطة الحاجة اللى بتدايقنى بعديها او بطنشها وبفكر وبركز تفكيرى اوى فى المرحلة اللى انا عايزاها يعنى بعيش حياتى زى ما انا عايزة
فيه ناس بتشوف ان ده نوع من الاستعجال يعنى لما خلفت بنتى كنت مستعجلة انها تحبى ولما مشيت اول خطواتها كنت مستعجلة انها تتكلم 0دايما بفكر فى مرحلة لسه مجاتش00يمكن عشان ببقى عايزة احس ان لسه فيه حاجة انا عايزاها ومستنياها وده فى حد ذاته بيدى للواحد امل وطول ما الواحد عايش وبيحلم وعنده اهداف وطموحات واحلام كتيييييييييييييير
اوى اوى والحاجات دى بتدى لحياتنا معنى وطعم وروح 0انا مجرد ما بفكر فى حلم معين فى دماغى واتخيله اوى واعيش معاه بحس بفرحة فظيعة ونشوة كان الحاجة دى فعلا حصلت واتحققت00ومن افضل العبادات انتظار الفرج0وانا بقى دايما فى انتظار الفرج0ولما بيجى الفرج0
بستنى فرج تانى فى مجال تانى0
اصل يا جماعة الاحلام ما بتنتيهيش0وملهاش اخرررررررر00
واحلى حاجة انك تفضل حاسس انك فى مرحلة مؤقتة وما تفرحش بحاجة اوى0
ناس بتقولى انتى مش بتحمدى كده ربنا00
بالعكس ده منتهى الايمان بربنا وطمعى فى كرمه بستنى دايما المزيد0ربنا سبحانه قال ولئن شكرتم لازيدنكم00يعنى ربنا عارف النفس البشرية اللى بتطمح للمزيد00وفى نفس الوقت ربنا برضه قال:ما اصاب من مصيبة فى الارض الا فى كتاب من قبل ان نبراها ان ذلك على الله يسير0لكيلا تاسوا على ما فاتكم ولا تفرحوا بماءاتاكم والله لا يحب كل مختال فخور0صدق الله العظيم
يعنى ربنا مش عايزنا لانفرح اوى بحاجة ولا نزعل اوى على حاجة0ما نزعلش على اللى فات وبرضه وما نفرحش اوى باللى جاى00انا بقى هكلمكم عن اخر احلامى00طبعا بعد الصحة والستر0انى ابقى كاتبة مشهورة اوى واخد جايزة الدولة التقديرية فى الادب0واتخيل انى عايشة فى اسكندرية جمب ماما حبيبتى00وان بنتى تكبر وتبقى عالمة وتخترع اى حاجة وتاخد جايزة نوبل وتهدى نجاحها لمامتها حبيبتها0احلموا احلموا يا جماعة احلى حاجة الاحلام00انا عن نفسى متاكدةة ان اليوم اللى مش هحلم فيه هيبقى اخر يوم فى عمرى

الانتظار

ليه الانسان لما بيستنى حاجة ما بتجيش00لازم الواحد يعمل انه مطنش ومش مهتم بحاجة ولا مستنى حاجة00وهيا هتجيلوا لغاية عنده00والواحد اللى بيكون عايز حاجة بجد ونيته فعلا خير00ربنا بيديله على قد نيته وبيديله الحاجة دى00لكن مش معنى ان الواحد ما يستناش حاجةانه يهمل الحاجة اللى عايزها00لاء طبعا لازم يسعى ويشتغل ويدعى ربنا ويتوكل عليه00وما يفكرش فى الحاجة دى00لكن تبقى جوة قلبه0متمكنة منه0بس من غير ما تعمله تفكير سلبى او ياس او احباط00يعنى يتمناها من غير ما يستناها00ولو كانت جاية له فعلا ومن حقه ومكتوبه له هتجيله لغاية عنده00ولو كانت من نصيب حد تانى هتروح للشخص التانى00لكن ما تزعلش لان اكيد فيه حاجات تانيبة هتجيلك والحاجات دى هيا اللى مستنياك00مستنية انهها تجيلك00لكن لما تجيلك ما تبقاش تنسى انك تحمد ربنا عليها0
اصل فيه حاجات ربنا بيديها لنا من غير ما نتمناها يعنى بتجيلنا قبل ما نفكر فيها او بنتولد نلاقيها فعلا عندنا يعنى ما تعبناش فيها ودى لازم نشكر ربنا عليها
وحاجات لازم نطلبها من ربنا عشان يديها لنا0نطلبها بالدعاء المستمر والالحاح ودى لازم نشكر ربنا عليها لما يستجيب ويديها لنا
فيه حاجات بقى بنطلبها لكن مش بتجيلنا لانها بتكون مش من نصيبنا ولازم برضه نشكر ربنا عليها لانها اكيد مش الخير لينا000

مشهد من فيلم

حوالى عشر اشخاص بيتفرجوا على نفس المشهد من فيام حريم كريم00المشهد عبارة عن ان جى جى مدايقة من زميلاتها ف الشغل عشان بيسالوها اتطلقتى ليه وكده وسابتهم ومشيت ورجعت تعيط لمامتها00شوفوا بقى كل واحد لفت تظره ايه فى المشهد ده00اختى الدكتورة اللى طلع عينها ف الشغل قالت: حلو اوى الشغل ده اللى لما تدايق تروح من غير حتى ما تستاذن المدير
اختى التانية بقى مهندسة بس مهتمة بنفسها اوى قالت:حلو اوى فستان ياسمين عبد العزيز لونه يجنن
جوزى طبعا انتوا عارفين علق على ايه على العربية اللى جى جى راجعة بيها من الشغل:حلوة اوى هغير العربية اللى معايا واجيب زيها
اخت جوزى اللى بتستعد للجواز وبتجهز شقتها قفالت:لون الحيطان فى شقة مامت جى جى خطيرة وموضة فى الشقق السنة دى
صحبة اختى اللى بتعمل ريجيم:لو جسمى يبقى زى جسم ياسمين البس براحتى اللى نفسى فيه00
ماما بقى علقت على مامت جى جى :مامتها حلوة ومتزوقة احلى من بنتها

صحبتى كلمتنى تسالنى:ايه رايك فى لون شعر ياسمين؟ يليق عليا؟
اخويا اللى بيدور على عروسو:لو الاقى واحدة كده0بحب اوى ستايل البنات زى ياسمين طويلة ورفيعة وشعرها طويل
طبعا نفسكوا تعرفوا انا ايه اللى لفت نظرى 00اكيد فاكرين بما انى مشروع كاتبة يبقى لفت نظرى قصة الفيلم والتاليف وكده00لاء لفت نظرى حاجتين تحديدا00اول حاجة ان مؤلفة الفيلم متجوزة المخرج بتاع الفيلم قصة حب يعنى اصل انا رومانسية اوى وتانى حاجة لفتت نظرى نوع التليفزيون اللى كنا بنتفرج فيه ع الفيلم حلو اوى والصوت مجسم 00ده مش اعلان 00بس بجد عجبنى اوى00المهم شوفتوا ازاى بقى نفس المشهد لكن له اكترلا من تاثير على اكتر من شخص00 وتقولوا لى ان الافلام هابطة00ازاى بس

العربية ضرتى

كل الستات بتدايق لما بتخرج مع اجوازها عشان بتلاقى جوزها يبص على البنت الحلوة المعدية وشوية يبص على الست زى القمر اللى راكبة العربية انا بقى جوزى بيبص على حاجة تانية خالص لما بينزل معايا مش ع القمر اللى جوة العربية  لاء على العربية نفسها ويسبل عينه ويتغزل ويعرق الله حلوة اوى اساله:مين دى اللى حلوة؟ يرد بسرعة:العربية اللى راكنة هناك دى لونها كمان حكاية ما شاء الله
اساله:ودى نوعها ايه؟
يرد: اوكتافيا
وبعد شوية ياسلام هيا دى العربيات بصحيح
اساله:ونوعها ايه دى كمان؟
يرد: بى ام يا جاهلة
انا:طيب
مش عارفة ايه حكاية العربيات معاه انا بحس ان العربية دى ضرتى بيحبها بجد وبيهتم بيها وعايز يقضى طول الوقت معاها طب تعرفوا انه تقريبا غير نوع عربيتها حوالى 3 مرات فى شهر واحد
اول مرة نزلت من بيتنا لاقيت عربية جميلة لونها زيتى سالته:نوعها ايه دى يا حبيبى؟
رد بقرحة: ميتسوبيشى لانسر
قلت له:بس حلوة اوى وواسعة
قالى : بس فيها عيب
سالته: ايه يا ترى؟
رد:مفيهاش تكييف اصلها جاية من برة وبرة انتى عارف تلج مش بيحتاجوا التكييف فى حاجة
قلت له:مش مهم ما احنا فى الشتا لسه
قالى:عايز الحق ابيعها قبل الصيف ما ييجى ماحدش هيرضى يشتريها
سالته: ما ينفعش تركب لها تكييف؟
رد:طب ليه ابيعها اسهل لى
انا: طيب
وبعد حوالى اسبوعين موبايلى رن الو ايوة يا حبيبى
هو:اطلعى البلكونة كده عاملك مفاجاة
طلعت بصيت لاقيت عربية بيضا حلوة اوى اصل انا بموت فى العربيات البيضا
لما طلع سالته:نوعها ايه
رد:دايو لانوس
انا:شكلها حلو اوى
وبعد حوالى اسبوعين برضه  قرب منى وبص فى عينى وقالى: العربية بدات تفتح بقها
سالته بخوف:يعنى ايه
قالى:يعنى مش متضبطة معايا خنقتنى
قلت له:هيا لحقت
قال:انا قدامى هيونداى اكسنت حلوة اوى
هنا بقى قلت ما بدهاش بقى :حرام عليك يا شيخ ارسى على واحدة انت مش عارف تستمتع بحاجة وفى الاخر كلهم باربع عجلات وبيمشوا مفيهومش واحدة بتطير مثلا ولا فيها جناحات ارحمنى بقى انا كل ما احفظ نوع وشكل عربيتك تغيرها طب تعرفوا انا مرة نزلت من البيت على ان عربية جوزى دايو بيضا وقلت له يعدى عليا يوصلنى بعد ما اطلع من الكوافير ونزلت من الكوافير وفضلت مستنية حوالى نص ساعة وبعد كده اكتشفت انه قاعد فى العربية يضحك عليا عشان انا معرفتوش طبعا عايزين تعرفوا كان راكب ايه دايو برضه بس نبيتى

هتلبس ايه النهارده؟

اصعب حاجة فى الدنيا هى الاختيار زى انك تختارى بين عريسين او بين وظيفتين وبين كليتين او بين لبسين او بين عربيتين او بين قناتين فى التليفزيون وتفضل ماسك الريموت تقلب فيه وما تتفرجش فى الاخر على حاجة خالص كان فيه زمان فيلسوف مش فاكرة اسمه دلوقتى المهم دولابه كان فيه بدله واحدة عشان ما يضيعش وقت فى التفكير هلبس ايه النهاردة؟؟اصعب حاجة انك تختار بين حاجتين وكلما زادت البدائل بيبقى اصعب وده يعتبر نوع من الصراع النفسى يعنى تبقى محتار بين بديلين وفى رايك ان الاتنين ليهم نفس المزايا وكل بديل بيشدك نحيته شوية عشان كده ربنا عمل لنا الاستخارة عشان هو اعلم مننا بلخير والشر انا واجهت الصراع ده قبل الجواز فى الكلية مثلا كان بيبقى فيه اكتر من واحد معجب بيا وعايز يخطبنى وبعد ما اتخرجت والمفروض انى اختار واحد بس عشان اتجوزه  كانت بتعدى عليا ايام صعبة اوى و اكتشفت انى اخترت من غير ما احس واستريحت بعد ما اخترت سواء بقى الاختيار كان صح ولا غلط بس المهم ان الواحد يختار ويختار بنفسه مش يخلى حد يختار له انا اعرف واحدة ما اتجوزتش لغاية دلوقتى عشان خايفة تختار واحد وتتمسك بيه ولو حصل منه حاجة بعد كده اهلها هيقولوا لها اتحملى نتيجة اختيارك وهيا الحياة كده كلها اختيارات واختياراتك هيا اللى بتحدد حياتك وبترسم شكلك وشخصيتك اختياراتك فى لبسك حتى وف مستفبلك هتدخل كلية ايه وناوى تشتغل ايه وهتتجوز مين وهتختار على اساس ايه؟سبحان الله ربنا خلقنا نختار وع الاساس ده هيحاسبنا ناس كتير بتقول اننا مجبرين بس لو كده يبقى ليه نتحاسب؟ انا شخصيا بحب راى ابن رشد اننا مجبرين ف حاجات ومخيرين ف حاجات ظروفك مثلا اللى اتولدت بيها مجبر فيها زى ان ك تلاقى دى امك وده ابوك ودى اختك وانك من اسرة فقيرة وانك بيضا مش سمرة مثلا لكن افعالك بعد كده كلها باختيارك وده اللى ربنا سبحانه وتعالى هيحاسيبنا عليه حاولوا بقى على قد ما تقدروا تختاروا اختيار صحيح عشان ما تدفعوش تمن اختياركوا ده غالى وتندموا طول حياتكوا وعشان كمان هنتحاسب على اختيارتنا واول ما هنحاسب هنحاسب نفسنا على سوء الاختيار

حكاية الطبيخ

انا ماكنتش الاول بحب اطبخ يعنى كنت بمزاجى كده ادخل المطبخ اعمل حاجة عبيطة يعنى هوت دوج ببصل وطماطم وفلفل اخضر واحطىه فى سندوتش احمر فراخ بانيه احمر بطاطس لكن طبعا بعد ماتجوزت اتادبت بقيت بقى شطورة خالص ولما تقول رانيا يعنى بتقول مكرونة فرن وصينية رقاق باللحمة المفرومة وطبيخ خدوا عندكوا بقى بسلة وكوسة وكشرى لاء الكشرى مش خضار بس بعمله تحفة برضه والبانيهات بقى بانواعها شاطرة فيها ونسيت اقولكوا بعمل شوربة ثمار البحر روعة جنان والله ده غير شاورما القرصان والتارت بالجبنة وغيرهم المهم انا اكتشفت بعد الجواز ان الطبيخ ده حاجة ممتعة اوى يعنى شعور حلو اوى لما تحطى المكونات قدامك زى منى عامر كده وبعدين تحطى ده على ده وتقلبى بتمكن زى الشيف اسامة وتزودى مية او ملح وفى الاخر تطلع لك اكلة زى الفل وتشمى روايح حلوة فى مطبخك(على فكرة ده مش اعلان عن بوتاجاز ولا حاجة) واحلى حاجة بقى لما تلاقى الناس تدوق اكلك وتشكر وتنهبل دى بجد بتبقى متعة فظيعة بتحسى بفخر وزهو محصلش وجوزك بيبقى متشرف بيكى قدام الناس والناس تشاور عليه فى الشارع مش ده الراجل اللى مراته بتعمل مكرونة بشاميل حلوة اوى والناس بقى تحسده وتقر عليه وفى الاخر يا اما يجيله سكر يا يجيله المرارة وما يعرفش يدوق الاكل اللى بتعمليه اصل عين الناس وحشة برضه بس على فكرة جوزك اللى بيخليكى يا تحبى الطبيخ يا تكرهيه يعنى لو بيحب الاكل وبيشجعك هيخليكى تبدعى له وتفننى له ولو العكس هتعملى له اى حاجة وخلاص انا اعرف واحدة عايشة مع جوزها ع الاكل الجاهز متفقين مع محل كل يوم يبعت لهم حاجة من المنيو اهى ريحت نفسها برضه من وقفة المطبخ والمواعين بس برضه الاكل الجاهز ده مضر خالص على فكرة بس برضه ممكن تتعبى نفسك وف الاخر جوزك ما يعجبوش اكلك ويدوق الاكل وما ينطقش وتحاولى تستفزيه :اخبار الاكل ايه يا حبيبى؟
يرد ببرود: شغال كويس
تساليه تانى ما انتى مملة بقى:حلو ولا وحش يعنى؟
يرد ببرود اشد:معقول بس الفراخ بتشد شوية والشوربة ملهاش طعم والرز مش مستوى ووو
تقاطعيه: والله ما انت مكمل انا استاهل ضرب ال انى سالت
انا اختى بقى جربت تعمل مكرونة بشاميل بس ما ضبطتش معاها والبشاميل باظ خالص وبقى عجيب بس برضه قدمتها لجوزها ع الغدا
قالها: ايه دى؟
قالت له بثقة جامدة اوى: دى اكلة يونانية اسمها ميكو باستا
قالها بانبهار: حلوة على فكرة بس تعرفى فيها شبه من المكرونة بالبشاميل
وهكذا بقى اختى دى شغالة كده على طول مرة تقول له اكلة يونانية ومرة هندية ومرة كان جايب صنايعى يصلح حاجة فى البيت وبعدين قدم له اكل واتغدى معاه
الصنايعى بعد حوالى معلقتين كده تنح وقال: ايه الاكلة دى يا بيه؟
الزوج المخدوع بثقة: دى اكلة سعودية حلوة اوى
الصنايعى منبهر: بجد طب ابقى هاتى لى طريقتها من الست هانم عشان اخلى مراتى تطبخها للعيال اصلهم بيحبوا السعودية اوى
جوز اختى ده بقى معووج علينا ولما يجى يلاقينا طابخين يبص لنا من فوق لتحت ويقول: لاء انا مراتى مدلعانى خالص وكل يوم اكلة غريبة مرة يونانى ومرة هندى تقريبا ما بقتش باكل الاكل بتاعكم ده خالص والله جوز اختى ده صعبان عليا بس ياللا قضا اخف من قضا مش احسن من الاكل الجاهز برضه ايش ضمنكوا ان اللحمة اللى فى السندوتش دى لحمة بقر مش يمكن لحمة حمارربنا يسترياللا انا هقوم بقى دلوقتى اطلب لى سندوتش سمك دليفرى كده من ماكدونالدز اصلى بحب اوى سندوتش السمك الفيليه بتاعه

بكلم نفسى

انا مش مجنونة ولا حاجة انا بس عايزة اتكلم مع نفسى شوية اصل فيه حاجات كتير شغلانى ومهتمة بيها اوى خالص وعلى فكرة الكلام اللى انا بقوله ده لنفسى يعنى واللى عايز يقراه يتفضل ويشاركنى رايه فى الحاجات الغريبة اللى بقولها رانيا كمال